Siujhoengz dwg boux baengzyoux ndei gou, boux vunz de mbouj sang, song lwgda ndongqliklik daegbied miz saenz, aenbak iqetet haenx daegbied dwggyaez, byoem ndaemndwt. De mboujdanh cingzcik ndei, caemhcaiq vuedbuet dwggyaez, gyaez bangcoh bouxwnq.

Geiq ndaej miz ngoenz ndeu cuengqhag le, mbwn doekfwn hung, gou mbouj miz liengj, danhseih fwn cungj mbouj dingz, youh mbouj miz bouxlawz soengq liengj daeuj hawj gou. Gou mbouj siengj saekdi, couh rwedfwn byaij baema lo.

Sawqmwh, gou dingqnyi miz vunz hemq gou:“Siujli, caj gou lwi?” Gou baez nyeux gyaeuj yawj, dwg Siuj- hoengz. Gou siengjdaengz ngamq caeuq de doxceng gvaq, de itdingh dwg daeuj yawj gou deng fwn rwed lo, daeuj yawj riu gou lo. Gou siengj daengz neix, byaij ndaej engq vaiq lo, couh siengj baenzlawz mbouj hawj de yawjraen gij yienghsiengq neix. Siengj mbouj daengz, de lij dwg gyaep hwnj gou lo, dawz aenliengj yaengx hwnj gwnz gyaeuj gou naeuz:“Mwngz baenzlawz mbouj caj gou, fwn rwed dumz mwngz lo. ”Gou mbouj han de, lij dwg yiengq naj byaij bae, “Mwngz lij vih saeh gaxgonq mbouj leix gou ha, raeuz dwg baengzyoux ndei, dawz gienh saeh haenx lumz lo, ndaej mbouj ndaej?” Siujhoengz itmienh bang gou dangj fwn, itmienh naeuz, gou raen de gig miz sim gangj, youh caensim daeuj bang gou, heiq hix siu lo, ngaekngaek gyaeuj caeuq de itheij byaij baema. De dawz liengj cungj nyeng haeuj baih gou, bat mbaq de cungj dumz lo. Byaij daengz ranz gou, gou mbouj ndei eiqseiq doiq de naeuz:“Docih mwngz, buh mwngz deng rwed mbaeq lo, gou bae ranz aeu buh daeuj vuenh ba?” “Mbouj yungh lo, gou lij gip baema cawj ngaiz hawj daxbuz gwn ne.” Gangj sat, de couh byaij deuz lo, yawj aen ngaeuz de youq ndaw fwnz menhmenh byaij bae gyae, fajnaj gou hoengz lo, caeuq Siujhoengz doxbeij, gou caen dwg ca lai lo, caen wnggai ndeindei yiengq de hagsib.

Daj seizhaenx hwnj, gou engq gyaez caeuq Siujhoengz itheij hagsib lo, gou aeu guh boux vunz caeuq de ityiengh.

(lauxsae son’gyauq Loz Sau- veiz/罗少维)