Gou mbouj guhsing.

“Mwngz hix rox, diuz roen gyae’gyanggyang…… Ndang gou naekgywgywg, gou dawz mbouj ndaej byukndang gou.”

Gou caiqlij mbouj guhsing.

“Hoeng, gou guh yienghneix couh guhlumj vit byukndanggaeuq bae. Vit byukndanggaeuq mbouj miz gijmaz doeknaiq go……”

Gou vanzlij mbouj guhsing.

De miz di simnaiq, hoeng gojlij aj bak naeuz dem:

“Neix hix haemq ndei, mwngz hix rox. Gou hix itdingh ngiengx gyaeuj yawj ndaundeiq. Aen’aen ndaundeiq cungj miz aen mboq ndeu, cungj miz aenloek hwnjmyaex. Sojmiz ndaundeiq cungj miz raemx- mboq hawj gou gwn……”

Gou caiqlij mbouj guhsing.

“Mizyinx lai bw! Mwngz yaek miz haj ik aen lingz, gou yaek miz haj ik aen mboq……”

Gangj liux de hix mbouj guhsing nauq, aenvih de cingq daejnga’nga.

“Daengz gvaq! Gou gag byaij yamq ndeu lo.”

De naengh roengzdaeuj, aenvih de lau lai. Hoeng gvaq yaep de caiqlij naeuz dem:

“Dujva gou……gou deng dawzrap. De unqnemnem, gvai- gvetgvet! De dandan miz seiq saenj oen henhoh ndang ndwi……”

Gou caemh naengh roengz- daeuj, aenvih gou goj ndwn mbouj onj lo, gou naiq lai fuengx lai. De naeuz:

“Couhdwg doenghgij neix lo……mbouj miz gijmaz yaek gangj dem lo……”

De yupyat mbat he, liux couh ndwn hwnjdaeuj. De byaij baenaj yamq ndeu, hoeng gou cak mbouj ndaej ne.

（41）