Seizdoeng, aen geiqciet nitsisi ndeu, rumzbaek cifofo, dauq miz cungj doenghgo ndeu laeglemx didmaj. De, couh dwg go faexraeu daengjgywdgywd haenx, de mbouj lau nit, yied nit yied daengjsoh. “Mbawnae hoeng gvaq va ngeih nyied”, boux sij sei Dangzdai Lij Muz coenz sei cienzdanq baenz cien bi neix, couh dwg danqhaenh gij cingsaenz faexraeu.

Gij faexraeu Gvangjsih Dwzbauj did baenz ndoi baenz rungh, gyae’gyae muengh bae, mdawraeu lumjbaenz ndaem youq gwnz bya nei.

Rumzbaek, daihdangq dawz deuz gij raeujrub seizcin, dauq fouzfap dawz deuz gij ndatcingz lumj feiz faexraeu, gij mbawraeu lumjbaenz naeuz: “Rumzbaek, mwngz ci ba, mwngz ning mbouj dawz mbawraeu!” Gangj sat, mbawraeu baez saenq ndang, doek roengz geij mbaw faexraeu hoengzfifi, lumjbaenz yienjbaij: “Mwngz yawj, gij mbaw gou hoengz lumj lwgfeiz ne, geijlai gyaeu ho!” Dahraix, gij mbawraeu lumj feiz hoengzfodfod haenx doxcomz youq itheij, aenbya, deng gij mbawraeu deihdindin haenx cimq youq baihndaw, lumj coemh feizfoengx, hawj vunz nyaenx mbouj ndaej dingz din ngonzyawj.

Lij miz gij gyaeundei hawj vunz doenghsim haenx, couh dwg mienh raemxhuz caem- rikrik lajdin neix, yawj gij mbawraeu hoengz lumj feiz haenx, gou lumj- baenz hix bienq baenz mbaw faexraeu ndeu, dem gij mbawraeu itheij guhcaemz guh’angq, doek youq gwnz mienhhuz lumj aengingq haenx, baenz raq baenz raq rumz ci gvaqdaeuj, gou fouzfetfet youq gwnz mienhhuz lumj aengingq neix, couh raen raemxlangh baenz gyongx baenz gyongx fubfub fedfed, mumjumj gyumq- gyumq ingjcik gij ngaeuz lumj feiz gou……

Faexraeu, gyaeu dwk baenzneix oksaek, gou gingqcungh gij cingsaenz mwngz!

(Vangz Swhyiz raiz Goenggen hoiz)