Miz ngoenz ndeu, danghnaeuz mwngz fatyienh youq seiqlengq gyoengq daxgoeng daxbuz gwnz gyaeuj cungj daenj aenmauh maj rim dujva moqset seiz, mwngz cienfanh gaej raen geizgvaiq, gijhaenx dwg gou cienmonz vih gyoengq daxgoeng daxbuz guh “aenmauh hoengheiq moqseuq”.

Aenmauh dwg aeu caizliuh gig mbaeu gig mbang daeuj guh baenz, yienghneix daenj hwnjdaeuj gawq mbaeumbimbi youh cwxcaih raixcaix. Aenmauh faen miz sam caengz, caengz ceiq baihlaj caeuq aenmauh itbuen ityiengh, ndaej daenj gwnz gyaeuj bae, caengz cungqgyang ancang miz aen fanhnwngz gaepsouheiq, de ndaej supsou gij heiqfeiq、namhfoenx caeuq cabyaem, lij ndaej bienqvaq baenz yingzyangj hawj doenghgo majhung. Caengz ceiq gwnz couh lumj aen vabuenz ndeu, youq ndaw de ndaej ndaem gova mwngz siengj ndaem haenx. Ndaw mauh lij ancang miz cungj ganjyingmok saenzgeiz ndeu, moix baez gyoengq daxgoeng daxbuz daenj hwnj cungj mauh neix seiz, ganjyingmok baez bungz daengz byoemgyaeuj roxnaeuz naenggyaeuj seiz, couh lumj haigven ityiengh hai fanhnwngz gaepsouheiq ndaw daihngeih caengz, ndigah, mboujlwnh gyoengq daxgoeng daxbuz byaij daengz gizlawz, gyoengqde hoeng- heiq seiqlengq cungj ndaej bienq- baenz moqset seuqcingh, gwnz dingjgyaeuj dujva hix fatok heiq homfifi, geijlai cwxcaih ha! Dang aenmauh duet roengzdaeuj seiz, gij yingzyangj ndaw aenmauh lij laebdaeb ndaej hawj dujva maj dem.

Gyoengq baengzyoux, baenzlawz yiengh? Vaiq di daeuj bang daxgoeng daxbuz mwngz cawx aenmauh dingj- gyaeuj maj miz dujva moqset ba! Roxnaeuz mwngz cam:“Gijmaz? Bae gizlawz cawx cungj mauh neix?”Hehe, dangyienz dwg daeuj ra gou la!

Neix couh dwg aenmauh ngoenzlaeng.

(lauxsae son’gyauq Cinz Cinhdonz/覃珍团)