“Caj mwngz mbouj simcaep le (seizgan rox yw ndei simcaep), mwngz cix rox aenvih roxnaj gou le sim’angq. Mwngz ciengxlwenx dwg baengzyoux gou. Mwngz yaek caeuq gou caemh riu caemh angq. Mbangjseiz, mwngz vih le angqfaengz simhai, cix rox ciengzseiz hai bakcueng bae. Gyoengq baengzyoux mwngz raen mwngz ngiengx gyaeuj cim gwnzmbwn riuhehe, gyoengqde cix raen geizheih dahraix. Daengz seizde, mwngz couh ndaej naeuz gyoengqde nyi: ‘Wgo! Ndaundeiq baezbaez cungj hawj gou riuhehe go!’ Gyoengqde couh laihnaeuz mwngz baenzbag baenzmbaj liux. Gaiqneix dwg gou loengh bajheiq hawj mwngz yakyawj……”

De riuhehe baezmoq.

“Cix lumjnaeuz gou mbouj dwg soengq ndaundeiq hawj mwngz, dwg soengq lailai aen lingz rox riu hawj mwngz.”

De lij riuhehe dem. Gvaq yaep ndeu youh mbouj riu lo, baetmaed dwk naeuz:

“Haemhneix …… mwngz gaej daeuj gizneix lo……”

“Gou mbouj lizhai mwngz.” Gou han de naeuz.

“Gou yawj hwnjdaeuj youqyak lai, guhlumj yaek dai liux. Mwngz gaej daeuj yawj gijneix, mbouj miz gijmaz baenzyawj ne……”

“Gou mbouj lizhai mwngz.” Gou han de naeuz.

De youheiq dangqmaz.

“Gou lwnh gijneix hawj mwngz nyi, dwg aenvih duzngwz. Mwngz gaej hawj duzngwz haeb deng bw, duzngwz yakdoeg lai, luenh haeb vunz……”

“Gou mbouj lizhai mwngz.” Gou han de naeuz.

Seizeix de couh lumjbaenz mizdi hoznet lo:

“Duzngwz haeb mbat daihngeih cix mbouj miz doeg lo.”

Haemhde, gou mbouj raen de couh gag deuz lo. De laeglemx deuz lo. Caj gou gyaiq hwnj de, de dingj byaij riuzriuz doxbae. Gag naeuz ndwi:

“O, mwngz riengz laeng daeuj lega……”

De gaem fwngz gou maenhdekdek, youheiq dangqmaz.

“Mwngz gaej daeuj lij lai ndei gvaq, mwngz daeuj le couh rox doeknaiq lo. Gou yawj hwnjdaeuj lumj yaek dai yienghde, hoeng gou mbouj dwg dai dahraix go……”

（40）