Ranz goengda miz aen suenbyaek hunghung ndeu, ndawde ndaem miz gak cungj gak yiengh byaek. Moix daengz ngoenzsinghgiz, daxmeh cungj bae ranz goengda doz aeu di byaek daeuj gwn.

Ngoenzneix youh dwg ngoenz- singhgiz, daxmeh caeuq bingzciengz ityiengh daiq gou bae ranz goengda guhcaemz. Caengz daengz ranz goengda ne, dou gyae’gyae couh yawjraen goengda gungjhwet youq ndaw suen nyaengq gaenj lo. Gou angq dwk vad fwngz yiengq goengda hemq: “Goengda, goengda, gou daeuj lo!” Goengda dingqnyi le, ngiengx gyaeuj yawj coh gou han naeuz: “O……lan gou daeuj lo! Vaiq daeuj, vaiq daeuj!”

Gou buet haeuj gyang suen bae, siengj yawjyawj goengda youq ndaw suen guh gijmaz lai. Yienzlaiz, goengda cingq rwed raemx coq byaekhau ne! Gij byaekhau rwed gvaq raemx le heuswdswd, gij caekraemx deng ndit ciuq le myigmyagmyag, ndei yawj dangqmaz. Mbouj rox mbouj nyinh, gou yawj ndaej haeujyinx liux! Goengda raen gou yawj ndaej mwnh liux, riu dwk doiq gou naeuz: “Daegsiengz, mwngz daeuj geq, youq neix gungh miz geijlai go byaekhau?” Gou sijsaeq cazyawj, mbiengj geq mbiengj amq suenq: “Goengda youq ndaw suen ndaem le song sek byaekhau, moix sek dwg ciuq moix coij 5 go daeuj ndaem, baenzneix song coij couhdwg 10 go. Gou youh baez song coij bae geq, sek daih’it gungh miz 4 aen song coij gya coij ndeu, yienghneix couhdwg 4 aen 10 caeuq aen 5 ndeu, gapsuenq daeuj couh dwg 45 go; sek daihngeih cingqngamj dwg 5 aen song coij, couhdwg 50 go. Song sek byaekhau gya hwnjdaeuj couh dwg 95 go. ”

Mwhneix, daengngoenz hwnj sang lo, Goengda raen gou youq ndaw suen byaij bae byaij dauq, riuhuhu dwk cam gou geq ndaej ok caengz. Gou dawz aen gezgoj haxbaenh bonjfaenh yienghlawz suenq caeuq geq ndaej lwnh de, goengda dingq le iet mehfwngz haenh gou naeuz: “Baenz vaiq couh geq ndaej ok lo, ak raixcaix! Caj mwngz baezlaeng hag ndaej fapswngz le, couh ndaej yungh fuengfap engq genjdanh daeuj suenq lo.” Ndaej daengz goengda haenh, gou angq raixcaix.

Gou sawqmwh naemj daengz hax- baenh daeuj seiz yawjraen goengda gungjhwet hawj byaekhau rwed raemx, hawj 95 go byaekhau rwed raemx couh ngaiz gungjhwet 95 baez, lij aeu hawj gyoengqde dwk bwnh、gaeb non……Yienzlaiz, daengx suen gobyaek maj ndaej baenzneix ndei cungj baengh goengda dwgrengz guhhong cij vuenh ndaej daeuj ha. Gou heuh goengda maeuq roengz, haenqrengz cup hwnj naj de bae, naeuz:“Goengda, mwngz dwg- rengz lo!” Sikhaek, goengda riu ndaej engq haisim lo, de umj gou hwnj sangsang, angqvauvau baeranz lo.

(Liuz Siengzyi raiz Ouh Caij- fangh hoiz)