“Wgo! Gou rox go……” Gou han naeuz.

“Neix couh lumj raemx, aenvih dwg aeu aenloek caeuq saenjcag rag hwnjdaeuj, gij raemxcingj mwngz hawj gou gwn de, lumj guhfwen yienghde……mwngz lij roxgeiq lwi……raemx neix van dahraix……”

“Wgo! Gou rox go……” Gou han naeuz.

“Gyanghaemh mwngz ngiengx gyaeuj yawj ndaundeiq, aen duh gou iq lai, yienghyiengh cungj iq lai, gou goj cim mbouj ok aenlawz dwg aen duh gou, gou vix okdaeuj mbouj ndaej. Yienghneix mbangjbaez goj lai ndei, doiq mwngz daeuj gangj, aen ndaundeiq duh gou dwg gyoengq ndaundeiq ndawde aen ndeu ndwi. Yienghneix aen’aen ndaundeiq mwngz cungj gyaez yawj liuxliux……Doenghgij ndaundeiq neix couhdwg baengzyoux mwngz. Gou lij miz gaiq huqlaex ndeu soengq hawj mwngz dem……”

De riuhehe baezmoq.

“A! Lwgvuengziq, Lwgvuengziq, gou gyaez nyi sing riu mwngz.”

“Wgo! Sing riu couh dwg gaiq huqlaex gou yaek soengq hawj mwngz go……Gaiq neix cix lumj raemx nei.”

“Mwngz naeuz gijmaz ne?”

“Bouxboux vunz cungj miz ndaundeiq ndanggaeuq.” De naeuz.

“Ndaundeiq mbouj doengz ndaundeiq. Doiq bouxlouzlangh daeuj gangj, ndaundeiq dwg bouxvixyinx. Doiq bouxwnq daeuj gangj, ndaundeiq dwg sagrongh ndwi. Doiq canghngeixngvanh daeuj gangj, ndaundeiq couhdwg gij doxgaiq gyoengqde yaek ngeixngvanh haenx. Doiq bouxguhgaicawx gou nyangzraen haenx daeuj gangj, ndaundeiq couhdwg ngaenz couhdwg cienz. Hoeng, doenghgij ndaundeiq neix cungj mbouj rox gangjvah nauq. Gag mwngz boux vunz ndeu miz aen ndaundeiq ndeu caeuq bouxwnq mbouj doxlumj nauq……”

“Mwngz naeuz gijmaz ne?”

“Gou youq gwnz aen ndaundeiq ndeu, youq gwnz aen ndaundeiq de rinhehe, gyanghaemh mwngz yawj gwnzmbwn, couh guhlumj aen’aen ndaundeiq cungj riuhehe, yienghneix mwngz couh yawjraen ndaundeiq rox riu.”

Seizneix, de riuhehe baezmoq.（39）