Gou ceiq boiqfug doengzhag gou——Loz Ningz. Gangj daengz de, daengx hagdangz mbouj miz vunz mbouj rox. Lwgda de yienznaeuz iq, danhseih gig miz saenz, riu hwnjdaeuj doiq lwgda lumj rongh- ndwen gungjnget nei laep baenz diuz sien ndeu. De cujciz naengzlig gig giengz, gou boiqfug de.

Miz baez ndeu, ndaw ban hai banhoih, mwh yaek haidaeuz, gyoengq doengzhag gig angq, cungj comzyouq itheij gangj mbouj dingz. Gou hemq geij baez “caem roengzdaeuj”, cungj mbouj miz yungh. Seizneix, banhcangj Loz Ningz byaij hwnj gyangjdaiz, riunyumnyum dwk naeuz: “ Gyoengq doengzhag , lajneix raeuz haidaeuz hai banhoih.” Gyoengq doengzhag raen de riunyumnyum couh caem roengzdaeuj. De couh gangj gij“yisuz vahgangj”, gangj ndaej gig ndei, youh caeuq doengzhag itheij camdap. Sawqmwh, de fatyienh Lij Fangh doengzhag cingq guhcaemz gig mizyinx, couh heuh de hwnjdaeuj hoizdap vwndiz. Lij Fangh sawqmwh deng heuh hwnjdaeuj, hix mbouj rox guh gijmaz ndei, naj hoengz daengz goekrwz bae. Loz Ningz mbouj gaenj mbouj menh byaij daengz henz ndang de, dawz vwndiz caiq gangj baez ndeu. Siengj mbouj daengz Lij Fangh hix ndaej hoizdap okdaeuj. Loz Ningz boux daih’it bobfwngz hwnjdaeuj naeuz:“Danghnaeuz mwngz mbouj guhcaemz hoizdap engq ndei ya.” Lij Fangh dingq le, mbouj ndei eiqseiq ngaem gyaeuj roengzbae. Gyoengq doengzhag siengj mbouj daengz Loz Ningz ok fap neix. Daj seizhaenx hwnj, baez daengz dangz banhoih, daihgya cungj nyinhnyinh caencaen hwnjdangz lo.

Loz Ningz mboujdan cujciz naengzlig giengz, de lij daegbied gyaez yawj saw. Gwnz gyaqsaw ndaw rug de baij rim saw, couh lumj aen cang saw iq nei. De dawz gij saw ndaw ranz yawj liux le, couh bae co saw yawj. De naeuz danghnaeuz gyanghaemh mbouj ndaej yawj saw couh ninz mbouj ndaek. Gij saw dozveh gou yawj haenx, de raen le mbouj leix mbouj langh, danghnaeuz dwg gij saw vwnzyoz, de couh rex dwk mbouj cuengq. De gingciengz dawz gij gojgaeq ndaw saw lwnh hawj gou nyi, neix sawj gou boux yawj saw couh gyaeuj in ndeu hix gag siengj yiengq de ciq saw yawj.

Loz Ningz couhdwg boux vunz yienghneix, gou boiqfug de.

(lauxsae son’gyauq Loz Sau- veiz/罗少维)