Ranz gou miz duz madoj ndeu, dwg gou bi’gvaq gvaq ngoenzseng seiz baengzyoux soengq hawj. Duz- malwg yaek daengz ranz gou seiz gaenq yaek ndaej bi ndeu lo, dangseiz de bwnnyumnyum、biz- lolo nei, lumj aengiuz bwnnyum- nyum nei, ndigah gou hawj de an coh guh “Giuzyungz”.

Gaej yawj Giuzyungz iq, hoeng mbei de hung dangqmaz. Miz mbat ndeu, gou caeuq baengzyoux youq gwnz ndoiiq guh gij caemz “rogndoi gouz lix” vunzcaen. Dou cingq caemz ndaej angq seiz, sawqmwh, miz duz ma’ndaem beij Giuz- yungz lij hung geij boix ndeu buet gvaqdaeuj! Ma’ndaem yakriri dwk yawj dou, baez yamq baez yamq coh dou bikgaenh byaij daeuj. Dou deng hwk dwk heiq hung cungj mbouj gamj cuengq, cij ndaej menhmenh doiq dauqlaeng. Seiz- neix, Giuzyungz roengzrengz raeuq hwnjdaeuj:“Vaeu! Vaeu vaeu! Vaeu vaeu vaeu!” Duzma’ndaem hix raeuq hwnjdaeuj, de song duz lumj dwg doxceng nei, duz mbouj fug duz. Gvaq yaep ndeu le, duz ma’ndaem cungjsuenq baenq laeng deuz lo, dou cij cuengq ok gaemz heiq hung ndeu! Gou umj hwnj Giuzyungz naeuz:“Giuz- yungz, mwngz caen ak ha!”

Gaej yawj Giuzyungz “dwk- baih” duzma’ndaem le, mwngz couh laihnaeuz de ak dangqmaz, gizsaed mbouj dwg yienghneix, de hix miz seiz mbei iq haenx. Miz ngoenzsinghgiz ndeu, gou youq ranz sij cozyez, daihgaiq gvaq buenq diemj cung le, cozyez sij liux lo, gou angqvauvau bae ra doengzhag guhcaemz. Hoeng gyoengq doengzhag mboujdwg dauqma ranz le, couhdwg okbae guhcaemz lo, gyonj daeuj gangj mbouj miz vunz youq ranz. Seizneix, gou siengj daengz yiengh guhcaemz miz yinxdaeuz ndeu——lienh Giuzyungz, hawj de daj gwnz daiz diuq roengzdaeuj. Gou ngamq dawz de hwnj gwnz daiz bae, de couh dwglau dwk “vaeu vaeu” raeuq hwnjdaeuj, daengx ndang saenzdikdik, mbouj gamj ning saek bouh. Gou sawq aeu gaiq nohndok ndeu yaeuh de, de vanzlij mbouj gamj roengzdaeuj. Gou cijndaej umj de roengz laj daiz daeuj. Ai, ndaek Giuzyungz neix ha, nanzdauh mwngz lau sang ha?

Giuzyungz caen dwggyaez dangqmaz, danghnaeuz de ndaej buenx gou ciuhvunz, yienghneix couh caen ndei daihraix lo!

(Lij Haucez sij Veiz Yinyiz hoiz)