Dujva gyaez daengngoenz, duzroeg gyaez mbwnheu, duzbya gyaez raemxlaeg, Bouxcuengh gyaez Sawcuengh.

Bi 2013, Sawcuengh sonhag youq daengx Vujsanh Yangh mbehai sawqdiemj. Gyoengq lauxsae raeuz couh gaenjmaed hopheux aen fuengcim cibroek cih sonhag Sawcuengh “aeu Cuengh guh cawj, Cuengh Gun doxgap, aeu Cuengh coi Gun, Cuengh Gun cungj rox” bae hwnjdangz. Hagseng cungj riengz lauxsae roengzrengz hagsib.

Gyauyuzgyah Dauz Hingzcih gangj gvaq:“daswyenz、sevei couhdwg gyaucaiz ndei. Sonhag mbouj dandan yungh bonjsaw ndwi.” 《Gij Byauhcunj Gocwngz Vahcuengh Sawcuengh》hix iugouz “lauxsae wnggai gig yawjnaek haifat leihyungh gocwngz swhyenz”. Ndigah, raeuz aeu yungh gij swhyenz bonjdieg ngamjndei daeuj bouj haeuj Cuengh Gun song vahsaw doengzbouh sonhag bae.

Lumjbaenz, youq mwh son sawloih moq, raeuz aeu dawz eiqsei Vahcuengh Vahgun daeuj doxbeij, lai gangj di laeh, mboujdanh aeu hawj hagseng roxyiuj aen eiqsei neix yungh song cungj vah baenzlawz gangj, lij aeu hawj hagseng rox cingcuj gyoengqde youq ndaw vahgawq mbouj doengz dwg gijmaz eiqsei. Lumjnaeuz: Sawloih Gun“草”doiq ndaej sawloih Cuengh “rum、nywj、haz、nyangj”，“花草”dwg “va rum”，“牛草”dwg “nywj vaiz(cwz)”，“柴草”dwg“haz”，“草鞋”dwg “haiznyangj”. Linghvaih, miz di sawloih ndeirwix geijlai hix mbouj doxdoengz. Lumjnaeuz：“Biz”aen sawloih neix,“bizlolo”dwg gangj lwgnyez biz ndaej ndeigyaez; “bizbodbod”couhdwg gangj vunzhung biz lai, vunz mbouj gyaez; “bizlulu”couhdwg gangj duzmou biz ndaej luenzlulu; “bizbwdbwd”couhdwg gangj noh biz lai, vunz mbouj gyaez. Couh yienghneix，doenggvaq Cuengh Gun doxbeij, lai lied geij aen laeh sawloih Vahcuengh, yungh gij Vahcuengh hagseng sug haenx bae hag rox Vahgun, couh ndaej hawj hagseng lai hag lai rox di sawloih lo.

Youq ndaw doengzbouh sonhag, leihyungh Cuengh Gun doxbeij faensik, lai gawjlaeh, yungh ndei Vahcuengh, ndaej hawj hagseng hag rox lai di cihsiz, guh daengz “aeu Cuengh coi Gun”.