Gou gej diuz gaendukhoz henjgim de ciengzseiz hot youq gwnz hoz haenx bae, aeu raemx yub goekrumz de, hawj de gwn di raemx he. Seizneix gou mbouj gamj cam de gijmaz dem lo. De baetmaed cim gou, song genfwngz de got hoz gou. Gou roxnyinh aensim de diuqbubbub guhlumj duzroeg deng fagcungq nyingz le yaek dai ne. De naeuz gou nyi:

“Gou sim’angq lai, mwngz coih ndei le rokbaenqcak aenfeihgih.” De naeuz, “Gvaq mbouj nanz mwngz couh ndaej baeranz lo……”

“Mwngz guhlawz rox ne?” Gou cam de naeuz.

Gou daegdaengq daeuj lwnh de nyi, gou coih ndei le feihgih.

De mbouj han gou nauq, naeuz dem:“Gou ngoenzneix goj ndaej bae- ranz lo……”

Gangj coenz neix liux, de simnae naeuz dem:

“Gou baeranz gyae lai……dwgrengz lai nw……”

Gou roxnyinh miz saeh yaek daeuj lo. Gou umj de haeuj ndaw rungj onjdupdup lumj umj lwgnyez nei. Gou roxnyinh de yaek doek roengz ndaw vaengz bae sohsoh, gou naemj rag de hwnjdaeuj, guhlawz rag cungj rag mbouj hwnjdaeuj……

Fajnaj de baetmaed lai, lwgda muengh coh baihgyae.

“Gou miz duzyiengz, aenhab caeuq aenmomh mwngz veh neix……” De dungxliengz riu naeuz.

Gvaq nanznanz bae, ndang de cingq raeujrub di.

“Daeg iq ha,” Gou doiq de naeuz, “Mwngz lau lwi?”

De lau dahraix! Hoeng cix sing- unq riunyumnyum naeuz:

“Haemhneix gou lij lai lau dem nw……”

Gou roxnyinh miz saeh yaek daeuj moq lo, gaiq saeh neix doxbae gouqdauq mbouj ndaej, gou simliengz lai. Seizneix gou cingq rox: Daengz- laeng gou mbouj ndaej nyi singriu neix lai lo, daengz seizde gou youqyak dahraix, gou dingj mbouj ndaej. Sing- riu de doiq gou daeuj gangj, couh lumj raemxmboq ndaw diegsa vancupcup sawdikdik neix.

Gou naeuz: “Lwgvuengziq a, gou lij siengj dingq singriu mwngz dem……”

Hoeng de doiq gou naeuz: “Haemhneix couh ndaej baenz bi lo……Bi’gvaq gou doek daeuj giz- neix, youq baihgwnz gizneix ra ndaej raen aen singgiuz gou……”

Gou naeuz: “Daeg iq ha, lwnh gou nyi doenghgij ngwzdoeg, gizdoxraen, lijmiz ndaundeiq, neix dwg loqfangz- hwnz ndwi ma？”

De mbouj han gou nauq, naeuz gou nyi:

“Lwgda yawj mbouj raen gij doxgaiq youqgaenj de……”

“Wgo! Gou rox go……”

“Couh lumjnaeuz dujva, langh- naeuz mwngz gyaez duj va gwnz ndaundeiq ndeu, yienghneix gyang- haemh mwngz cim bae gwnzmbwn couh vuenheij lai ndeimaez lai, roxnyinh aen’aen ndaundeiq cungj ok dujva liuxliux.”

（38）