Youq henz aenmboq miz faq ciengz loemqlak ndeu. Haemh daihngeih, gou guhhong ndei le cix dauqdaeuj henz mboq gizneix, gou lij youq gizgyae’gyae couh yawjraen Lwgvuengziq naengh youq gwnz ciengz, duengh song ga roengzdaeuj. Gou ndaejnyi de naeuz:

“Mwngz geiq mbouj ndaej luma?” De naeuz,“Mbouj dwg youq gizneix nauq!”

Aiq naeuz miz sing wnq han de, aenvih de han naeuz:

“Wgo! Wgo! Dwg ngoenzneix go! Hoeng mbouj dwg youq gizneix ne……”

Gou byaij coh faq ciengz, hoeng gou mbouj raen miz saek boux vunz wnq nauq, goj mbouj ndaejnyi saek yiengh sing nauq. Hoeng Lwgvuengziq han dem:

“……Wgo! Mwngz youq ndaw diegsa riengz rizdin gou byaij cix ra raen dieggaeuq lo, mwngz youq baihde caj gou couh ndaej lo, gou haemhneix bae baihde ra mwngz.”

Liz faq ciengz de lij miz ngeihcib mij gyae baedauq ndwi, hoeng gou lij caengz yawj raen gijmaz nauq.

Lwgvuengziq gvaq yaep he naeuz dem:

“Gij doeg mwngz ak lai lwi? Gou mbouj hoj in nanznanz bae, dwg lwi?”

Gou byaij daengz le, youheiq lai doeksaet lai, hoeng mbouj rox de yaek guh gijmaz.

“Deuz vei! Gou yaek saet roengzbae lo.” Lwgvuengziq naeuz.

Gou yawj coh dinciengz, mbwn ha, dwglau lai lo. Youq baihlaj miz duz ngwzhenj ndeu ngiengx gyaeuj daengj ndang sohnoengnoeng. Vunz deng cungj ngwzhenj neix haeb liux, gvaq buenq faencung couh dai dahraix lo. Gou doq yaek daehbuh, yut fagcungq okdaeuj, doq buet gvaqbae. Hoeng duzngwz baez nyi sing yamqdin gou, de couh deuz lo, cix lumj raemxmboq hawqro ityiengh baez yaepda couh ndonj haeuj ndaw namhsa bae lo. De mbouj vueng mbouj muengz dwk ndonj ning youq ndaw conghrin, fatok gij singyiengj gimsug lejlej ni.

Gou buet daengz dinciengz seizhaenx, cinjdeng dwk umj Lwgvuengziq haeuj ndaw rungj gou daeuj, mbawnaj de haunyo lumj nae.

“Mwngz yaek guh gijmaz ne? Mwngz vihmaz caeuq duzngwz gangjgoj ne?”

（37）