Gyoengq baengzyoux，daihgya ndei, gou heuhguh Lij Meiz. Youq ndaw doenghcaemh, aen ndang mbouj sang hix mbouj daemq, byoemgyaeuj henj lumj bwncwz, bwnda hix henj ndaej lumj mbouj miz ityiengh, ndigah daihgya cungj heuh gou guh “dahhenj”, gou couh riuhehe dwk, baenz ngoenz buet bae buet dauq, sim’angq ndaej couh lumj duzroeg nei mbin bae mbin dauq.

Gou gig ak bae youz, lumj lwgsai ityiengh manz. Geiq ndaej ngoenz ndeu banringz, ndit ndat raixcaix. Daxmeh bae haw dajcawx, heuh gou gag youq ranz yawj densi, iek le gag gwn cuk, gwn aen mak, cienfanh geiq dwk, mbouj ndaej gag bae rog guhcaemz. Gou sing hung han naeuz: “Gaej nam lo, gou rox lo.”Caj daxmeh ok dou le, gou mbouj goq daengngoenz ndat, caegcaeg bae daengz ndaw suenbyaek ra di duzndwen, liuxle buet bae henz diuz dah naj mbanj ep bya lo. Gvaq haujlai nanz, gou ep ndaej duz bya lumj song lwg fwngz gou lo. Ndaw sim angq raixcaix, cingq daekeiq siengj, caj yaep ndeu couh ep ndaej daengz bya hung la, haemhneix miz bya soengq caeuz gwn lo! Sawqmwh, dingqnyi sing daxmeh hemq, gou vuengmuengz vut diuz set haeuj ndaw dah bae, hoeng ndoj mbouj gib lo, cij ndaej han daxmeh. Yenzlaiz, daxmeh bae haw dauqma, mbouj raen gou youq ranz, couh sikhaek buet daeuj ra gou. Daxmeh sing hung naeuz:“Mwngz baenzlawz daeuj gizneix, daxmeh dauqcawq ra mbouj raen, haih daxmeh simyou lai lo, mwngz gagdog boux lwgnyez ndeu youq henz dah, geijlai yungyiemj ha, seizneix, hanh lae hanh roenx, vaiq di gaen daxmeh bae ma bw.”Gangj sat, couh gyaep gou baema, daengz ndaw ranz, ut hanh hawq le, youh doiq gou nambebbeb mbat ndeu. Daj neix hwnj, gou caiq hix mbouj gamj gag boux ndeu bae youz lo.

Gou bingzseiz hix gyaez lienh ndangdaej, lumjbaenz diuqcag ha, youzraemx ha. Hoeng, gou couhdwg dam guhcaemz, guhsaeh mbouj nyinhcaen. Miz baez ndeu, gaujsi Sawgun, gou dawz cozvwnz yawj loek lo, daezmoeg dwg 《Ngoenz Angq Ndeu》，gou cix sij baenz《Gou Boux Angq Neix》，gou caen lujlaj ha！Doeklaeng, gou roengz gietsim gaij bae gij mauzbing lujlaj, nyinhcaen hagsib. Seizneix, cingzcik gou youq ndaw nienzgaep dwg mbouj it couh ngeih ne！

Neix couhdwg gou, dah nyezmbwk coengmingz youh diuqbeiz ndeu. Danghnaeuz mwngz siengj caeuq gou guh baengzyoux, gou seizseiz angqcoux.

（lauxsae son’gyauq Cinz Cinhdonz/覃珍团）