Daihgya ndei, gou dwg aen makdoengj diemz ndeu. Seizhah, gou lij dwg mbaw vabieg iq ndeu, unjdede ninz youq ndaw rungj daxmeh. Hoeng seizneix, gou majhung lo, luenzlili, henjrwgrwg, gyaeundei raixcaix! Ngoenzneix haetcaeux, mehcawj gou dawz gou daj ndaw rungj daxmeh lad roengzdaeuj, caeuq gyoengq beixnuengx itheij deng rag daengz gwnzhaw bae gai. Dai lo, gou gag simvueng hwnjdaeuj. Gangj coenz vahsaed, gou yienznaeuz heuhguh makdoengjdiemz, caemhcaiq baihrog hix ndei yawj, hoeng baihndaw gou cix dwg soemjsat, danghnaeuz byawz cimz daengz gou, bau de lienz daeuhfouh cungj haeb mbouj ning lo.

Mbouj roxnyinh gijmaz couh daeuj daengz gwnzhaw lo. Gij seng- eiq mehcawj daegbied ndei, vunz humx baenz bang, gou swnhgei doiq laeng geij yamq, ndoj youq raeblaeng mbaw makdoengj ndeu. “Makdoengj gai gaen geijlai？” Gij sing unqnem- nem cienz daeuj. Gou buedhai mbaw makdoengj baez yawj, dwg bang sausenhduiyenz raek hungzlingjginh ndeu, gyoengqde miz caet bet boux vunz, moix boux ndaw fwngz cungj riuj faenh huqlaex ndeu. “Gyoengqde yaek bae gizlawz?” Ndaw uk gou gag ngeix. Lij caengz hawj gou caiq baez ndoj haeuj raeblaeng mbaw makdoengj, mehcawj couh gaenq dawz gou coq haeuj ndawj swxcuk boux sausenh- duiyenz haenx bae lo. Dai lo! Gyoengq lwgnyez neix danghnaeuz fatyienh doenghgij laeglemx gou, itdingh dawz gou lumj nyapnyaj ityiengh vit bae.

Gou cingq ngeix sam ngeix seiq, gyoengqde dauq hoedheux ngutngeuj, byaij haeuj aen ranz iq vaihvad ndeu. Ndaw ranz naengh miz daxbuz byoem hausagsag ndeu, raen bang lwgnyez neix, sikhaek angq lo, “ei, hagsib baenzneix nyaengq, lij siengj daengz boux yahgeq gou.” Gij riunyumj gwnz naj de couh lumj vagut mbehai. “Vangz daxbuz, dou lau mwngz mbwq lai, couh daeuj yawj mwngz lo. Daxbuz, mwngz cimzcimz gij makdoengj neix, gij makdoengj neix raemx caen lai, caen baenzgwn lo.” O! Gou hwk dwk ok baenz ndang hanh, yawjngoengngoeng ngonz faj fwngz nyaeuqnyadnyad Vangz daxbuz vax dawz gou, siujsim riri mbiq diuz buhrog gou, mbaet limq makdoengj ndeu, menhmenh cuengq haeuj ndaw bak bae. Sawqmwh, de nyaeuq najbyak, siengj haiz gou okdaeuj, hoeng dingz geij miux cung le, sikhaek ndwnj gou roengzbae. Doenghboux sausenhduiyenz ndwn youq henz ndang haenx cam:“Vangz daxbuz, diemz lwi?” “O……diemz, diemz raixcaix!” Yi, Vangz daxbuz mingz- mingz rox gou dwg soemj, hoeng……Ha! Gou rox lo, Vangz daxbuz mbouj dwg cimz gou, dwg cimz gij cingz gyoengq sausenhduiyenz haenx!

(Bwz Canhlingz raiz Goenggen hoiz)