Gobiuj gou gig sug rodnaehang, de dapwngq gou, caj mbwn raeuj di le, couh son gou rodnaehang.

Ngoenz singhgizroek gyanghaet, mbwn gvengq, gou caeuq gobiuj daeuj- daengz giz ciengz rodnaehang. Va, vunz daeuj rodnaehang caen mbouj noix. Mwngz yawj, gyoengq vunz cingq sim- angq dwk saj ne, mizmbangj lumj duz roegenq riengjred nei mbin dwk, youq ndaw vunz lai con bae con dauq; mizmbangj lumj duzmbaj nei mbinfifi, aen ndang yaep gwnz yaep laj guh gij yiengh gig ndeiyawj; mizmbangj siujsim dwk menhmenh rod……

Gou caj mbouj ndaej dwk naeuz:“Gobiuj, raeuz vaiq di roengzbae ba!”Hoeng, gobiuj menhnyednyed dwk naeuz:“Gaej gaenj, gaej gaenj, lij dwg sien ra giz dieg vunz noix ndeu, gou caiq menhmenh son mwngz ba!”Gobiuj bang gou daenj ndei haizrodnaehang, ciep- dwk dawz rodnaehang fuengfap gangj mbat ndeu hawj gou dingq, doeklaeng, de lij rod gij yiengh hawj gou yawj. Gou sim siengj: Rodnaehang caen ngaih ha, gou rox ndaej vaiq. Ndigah, gou couh ndwn hwnjdaeuj, gobiuj ngamq hemq “yaek re”sing ndeu, gou song din baez aj, caekhaex couh naekgywd dwk naengh gwnz naehang lo. Gobiuj riuriu naeuz:“Simgip gwn mbouj ndaej daeuhfouh ndat ne. Ngamq haidaeuz, sien aeu ndwn onj, aen ndang loq gaeuz roengzdaeuj, liuxle menhmenh rod baenaj.”Gobiuj gangj dwk, youh caiq rod baez ndeu hawj gou yawj. Gou nyinhcaen dwk ciuq gij fap gobiuj bae sawqsawq. Yi, gou gag ndwn ndaej onj lo. Gobiuj youh son gou baenzlawz baenaj, baenzlawz doenq- laeng, baenzlawz dingz roengzdaeuj daengjdaengj. Gou nyinhcaen dwk lienh, caen dahraix, mbouj caiq laemx lo. Lienh dwk lienh dwk, mbei gou yied daeuj yied hung lo, gou rod ndaej engqgya vaiq lo. Siengj mbouj daengz, cienqngomx seiz, rod daiq vaiq lai, “bap”sing ndeu, gou youh fad laemx roengz naehang lo. Caekhaex mazmwdmwd, gen fwngz gou lot bae gaiq naeng hung ndeu, oklwed lo, gou in ndaej raemxda lae okdaeuj lo.

Gobiuj yawjraen le, lienzmuengz buet gvaqdaeuj, rag gou hwnjdaeuj naeuz:“Gig in ba, hoeng, mwngz ngamq rox rod di ndeu, itdingh aeu laemxsim ha!”“Dwg ha, gou itdingh aeu genhciz roengzbae!”Gou ngaekngaek gyaeuj, haebhaeb heuj, uetuet raemxda, youh laebdaeb lienh hwnjdaeuj lo.

Doeklaeng, gou mbouj rox youh laemx geijlai baez lo, hoeng, gou cungj mbouj lau. Youq gwnz loh dauqma, gen fwngz gou lij in, hoeng, ndaw sim gou cix gig angq. Aenvih, gou gaenq rox gag rodnaehang lo.

(lauxsae son’gyauq Cinz Cinh- donz/覃珍团)