Daxmeh cungj naeuz gou mbouj rox gvansim de, hoeng gou nyinhnaeuz dang daxmeh mbouj miz gijmaz hoj, dwg gienh saeh youh angq youh soengset ndeu, mbouj beij doegsaw baeg ne. Ngoenzneix youh dwg ngoenzlijbai, bonjlaiz dwg ngoenz ndei hwnq gyang, hoeng ngoenzneix gou aeu dang “daxmeh”, daxmeh aeu dang “dahlwg”, dou song boux doxvuenh dang mehlwg.

Haetromh, gou heuh daxmeh hwnqmbonq, byawz rox de gik- gyanggyang fan le fan ndang, mbouj haengj hwnq, lij naeuz: “Mwngz dang dahlwg seiz, ngoenz singgeiz lawz mbouj dwg hwnq gyang?” Gou dingq le, hozgaek dwk bi aen nauhcung naeuz: “Vaiq hwnq, 9 diemj lai lo, daengngoenz caeux hwnj sang lo, gaenx gvaq mwngz geijlai bae.” Mwhneix, daxmeh cij menhyiedyied hwnqmbonq daenj buhvaq, bae swiqnaj catheuj. Daxmeh guh gijneix seiz, gou hix bae ndingq niuznaij roengz boi, dawz mienhbau cuengq dieb, youh gangq ndei le song diuz saejlab. Guh sat gijneix, daxmeh cij naengh gvaqdaeuj, lumj boux nangz- cawj haenx menhnyednyed gwn hwnjdaeuj, mbiengj gwn mbiengj naeuz: “Ngoenzneix gwn ndaej yaez lai loba?”

Daengz banringz, gou laihnaeuz ndaej ninz ringz yietnaiq yaep he, cix deng “dahlwg” neix nyoengx ok bakdou bae. “Mbouj dwg gangj ndei ngoenzneix bae gunghyenz ha? Vihmaz caengz hainduj bae ne?” Daxmeh mbiengj gangj mbiengj ndenq ngaenzbau hawj gou. “Ai, hwnjroen ba!” “Dahlwg” youq gunghyenz liuh le haujlai hangh- moeg, cungj dwg yungh gij ngaenz gou liux. Daengz banhaemh, gou siengj dauqdaej ndaej dingz roengz- daeuj loba, siengj mbouj daengz “dahlwg” youh heuh gou daiq bae gwn hojgoh……

Maranz le, daxmeh couh bae naengh sahfaz yawj densi lo, hawj gou boux ndeu guh hongranz. Funghdajswiq daebdong le baenz doi buhvaq uq caj gou, caen dwg aeu mingh lai lo.

Dang le ngoenz “daxmeh” ndeu, gou deng cimz le van soemj haemz manh gak cungj feihdauh, engqgya roxndaej yienghlawz sim in daxmeh lo.

(Liuz Yizdungz raiz Ouh Caijfangh hoiz)