De riu moq lo.

“Lwgvuengziq oiq, mwngz yienghneix naeuz, gou couh doeknaiq lai bw!” Gou naeuz, “Gou gag rox veh baihndaw roxnaeuz baihrog duznuem ndwi go! Gijwnq gou veh mbouj baenz go!”

“O! Yienghneix ha! Mbouj lau go!” Lwgvuengziq naeuz, “Lwgnyez yawj ndaej rox couh ndaej lwgo!”

Yienghneix, gou couh aeu yienzbit veh baenz aen momh ndeu hawj de yawj, gou ndenq mbaw veh hawj Lwgvuengziq seizde, ndawsim couh youqyak lai.

“Mwngz yaek bae guh gijmaz mbouj lwnh gou nyi, dwg lwi?” Gou cam naeuz.

Hoeng, de mbouj han gou nauq, naeuz gou nyi:

“Mwngz rox lwi, gou daeuj daengz gwnz deihgiuz neix……ngoenzcog couh ndaej hopbi ndeu lo……”

Gvaq yaep he, de youh naeuz dem: “Gou doek daeuj youq henzgyawj gizneix.”

De najnding lo.

Gou mbouj rox vih gijmaz, ndawsim doeknaiq lai, laegfwngh youh naemj daengz gienh saeh ndeu.

“Aen singhgiz ndeu gaxgonq gyanghaet, seizde gou baeznduj raen mwngz, mwngz gag boux vunz ndeu byaij youq ndaw diegsa fwzrikrik neix. Mwngz dwg yaek byaij dauq gizhaenx, giz mwngz doek roengzdaeuj haenx, dwg lwi? “

Lwgvuengziq najnding baez moq.

Gou yupyat naeuz: “Aiq dwg aenvih geiqniemh hopbi ga?”

Lwgvuengziq najnding baez moq. De mbouj ngah han gijneix, hoeng, najnding couhdwg naeuz “wgo”, dwg lwi?

“A!” Gou naeuz de nyi, “Gou miz di lau bw……”

Hoeng de couh han gou naeuz:

“Seizneix mwngz coj deng bae guhhong lo, bae coih rokbaenqcak mwngz, gou youq gizneix caj mwngz, haemhcog mwngz dauqdaeuj gizneix……”

Hoeng gou mbouj hoznet. Gou naemj daengz coenzvah duh nyaenma. Langhnaeuz mwngz deng gunx le, mbangjbaez couh rox raemxda lae……（36）