Gou riuj doengjraemx bae gyawj henz bak de. De laepda gwn raemx. Raemx vancupcup hawj vunz simyungz lumj gvaq ngoenzciet nei. Gij raemx neix mbouj lumj gijgwn wnq nauq. De vancupcup dwg aenvih song boux dou mbouj rox byaij geijlai roen yaengq ra raen, aenvih gij singfwen aenloek, aenvih gou okrengz rag raemx hwnjdaeuj. Yienghneix de couh lumj gaiqlaex nai aensim raeuz. Seiziq, ronghdaeng faexswngdan, fwen gyanghwnz, naj riunyumnyum, cungj hawj gaiqlaex swngdan bienq ndaej lai vuenyungz lai ndeimaez.

Lwgvuengziq naeuz: “Vunzlai gwnz deihgiuz neix, caemh aen suenva ndeu ndaem le haj cien go meizgveiq, hoeng gyoengqde mbouj rox bonjfaenh yaek ra gijmaz doxgaiq……”

“Wgo! Gyoengqde ra mbouj raen go.” Gou han naeuz.

“Hoeng gij doxgaiq gyoengqde yaek ra haenx, youq gwnz ndang duj vameizgveiq ndeu roxnaeuz ndik raemx ndeu couh ra ndaej raen lego!”

“Wgo! Naeuz ndaej deng!” Gou han naeuz.

Lwgvuengziq laebdaeb naeuz dem:

“Mbangj yiengh doxgaiq lwgda raeuz goj yawj mbouj raen, raeuz deng aeu sim bae yawj.”

Gou gwn raemx le, roxnyinh youqsoeng lai, sim goj lai onj di lo. Daengngoenz okdaeuj lo, diegsa ndongqwenj lumj dangzrwi, gou vuenheij lai. Hoeng mbouj rox vihmaz goj dungxliengz lai ne?

Lwgvuengziq daeuj naengh youq henz ndang gou, sing’unq naeuz gou nyi: “Mwngz han gou le mwngz coj deng guh daengz.”

“Gou han mwngz gijmaz le?”

“Mwngz naeuz……naeuz veh aen momh ndeu hawj duz yiengz gou……gou deng dawzrap hawj dujva gou.”

Gou daj ndaw daehbuh dawz mbaw veh okdaeuj, Lwgvuengziq yawj yaep ndeu, riu naeuz: “Go faexceizlingz mwngz veh neix, miz di lumj byaekhau ne.”

“A!”

Gou lij laihnaeuz gou veh faexceizlingz veh ndaej ndei lai ne.

“Duz nyaenma mwngz veh de, rwz yawj hwnjdaeuj lumj gaeu, veh ndaej raez lai.”（35）