Youq ngoenzsinghgiz ndeu, ndit rongh mbwn gvengq, duzroeg iq youq gwnz gofaex angq dwk ciengqgo, gou caeuq daxboh bae daengz rog hag- dangz, daxboh son gou gwih danci.

Daxboh lwnh gou:“Sien baij cingq gyaeujci, lij gaem maenh de, liuxle hamj ga hwnj ci, naengh onj lo, couh menhmenh yiengq baihnaj caij bae, mwngz ngamq hag gwih, mbouj ndaej caij vaiq lai, geiqndaej mbouj caengz?”Gou mbouj naihfanz dwk naeuz:“Geiqndaej lo!”Geizsaed gou cij siengj vaiq di gwih ci, daxboh gangj gijmaz cungj dingq mbouj ndaej haeuj rwz. Gou hainduj lienh gwih lo, daxboh rex gou hwnj ci, de ngamq cuengq fwngz, gou couh laemx roengz ci lo. Daxboh youh caiq naihsim dwk lwnh gou gwih ci fuengfap. Baez neix, gou nyinhcaen dingq dwk. Daihngeih baez, daxboh youq laeng ci rex gou, mbouj dingz dajheiq hawj gou. Mbouj rox seizlawz, daxboh gaenq langh fwngz bae lo, hoeng, gou lij gwih ndaej bae gig gyae, gou cingq ndaeggon ne. Hoeng, gou baez faensim, gyaeujci mbit lo, youh caiq laemx lo. Baez neix laemx ndaej fwngz lot oklwed, caekhaex in raixcaix, gou mbouj siengj lienh ci lo.

Daxboh byaij gvaqdaeuj doiq gou naeuz:“Daeglwg, mwngz aeu genhciz cij ndaej guhdaengz, mwngz mbouj siengj gwnhoj, baenzlawz ndaej guhdaengz； mboujlwnh guh gijmaz saeh cungj mbouj ndaej daengz cungqgyang couh vut ha. Seizneix, mwngz liz guhdaengz cij ca di ndeu lo, gyayouz!”Gou dingq vah daxboh lo, haebhaeb heuj, youh diuq hwnj danci bae, lienh baez youh baez, doeklaeng daxboh naeuz:“Lwg ha, mwngz gaenq laebdaeb gwih ndaej haj roek faencung lo, mwngz ndaej guhdaengz lo, mwngz caen ak ha!”Gou dingq le, youh caiq hwnjhwnj roengzroengz lienh yaep ndeu, cungj mbouj laemx saek baez lo, gou sim’angq dwk hemq hwnjdaeuj:“Gou guhdaengz lo, gou hag rox gwih danci lo!”

Baez neix, gou gig sim’angq, gou mboujdanh hag rox gwih danci, lij rox ndaej aen dauhleix: Hag bonjsaeh aeu mbei hung, mbouj ndaej cungqgyang couh ndek, cijaeu laebdaeb bae guh, couh ndaej guhdaengz !

(lauxsae son’gyauq Cinz Cinh- donz/覃珍团)