Moix boux vunz cungj miz haujlai haujlai baez daih’it. Lumj: baez daih- it ndaej ciengj、baez daih’it lijyouz、baez daih’it haihoih……Ngoenzneix, gou couh daeuj caeuq daihgya gangjgangj gou baez daih’it naengh feihgih ba.

Sujgyaj caet nyied cibroek hauh banringz, gou vuenheij dangqmaz, aenvih gou yaek caeuq bohmeh doengzcaemh bae Sanhya youzlangh. Neix dwg gou baez daih’it naengh feihgih, dou daeuj daengz Nanzdungh Hinghdungh Gozci Gihcangz. Hoeng, ngamq haeuj gihcangz mbouj yaep ndeu, gou couh fatyienh naengh feihgih caen mbouj dwg gienh saeh genjdanh ndeu. Sien aeu lingx biuq feihgih, caiq banhleix soujsuz dak- yinh, engqgya aeu louzsim haenx dwg mbouj ndaej daiq gij huq yungzheih dawzfeiz yungzheih dekaq. Guh gij saeh neix liux le, dou sikhaek haeuj- bae anhgenj, yienzhaeuh hwnj feih- gih.

Dou naengh aen feihgih dwg Augaij Hangzgungh Gunghswh Boh- yinh 737. Ra raen diegnaengh naengh roengzdaeuj liux le, gou miz cungj gikdoengh gangj mbouj ok haenx, baez neix gou caen dwg yawjraen feihgih dahraix lo. Seizgan haimbin daengz lo, ndaw gvangjbo cienz ok sing boux- gunghcej, de gangj gij saeh naengh feihgih aeu louzsim haenx, gou nyinhcaen dingq dwk, lau lauq saek cih saw bae. Gaengawq iugouz lamh anhcenzdai coq, ndaw sim gou yied daeuj yied gaenjcieng, sikhaek feihgih yaek haimbin, sien dwg mbouj duenh gya vaiq, caiq itcig cung hwnj gwnz bae, doeklaeng mbin hwnj gwnz fwj bae.

Feihgih hwnj daengz aen gauhdu ndeu le, bienq ndaej onjdingh le, gou cij gamj yawj yawj rog cueng. Va, gou deng gij gingjsiengq dangqnaj doeksaet ngawz bae——mbwn lamz lumj mienh haij, duj fwj hau couh lumj gangfung hau biu youq gwnz “haij”, gaenriengz rumz iq menhmenh youzdoengh. Hoeng mbouj yaep ndeu, raq giliuz maenh’ak ndeu gig vaiq couh ndoet gij gingjsaek gyaeundei neix bae lo, rog cueng lumj goemq caengz baengzmuengx hau ndeu, hawj feihgih saenqdaenh, gou mboujmienx miz di lau, gaenjcieng hwnjdaeuj. Daxboh naengh youq henz lumj dwg yawj rox gij simsiengj gou le, couh caeuq gou gejsik:“Neix cingqciengz, mwngz mbouj yungh lau.” Dingq gij vah daxboh le, gou cij cuengqsoeng roengzdaeuj. Couhdwg youq gij gaenjcieng caeuq gikdoengh simcingz ndawde, feihgih mbin song aen cungdaeuz liux le ancienz daengz Sanhya Fungvangz Gozci Gihcangz, gou sij mbouj ndaej dwk roengz feihgih, bae hainduj aen lijcwngz gyaeundei gou lo.

Baez daih’it naengh feihgih gamjdaengz caen ndei dahraix, hawj gou nanz lumz.

(Yenz Gvanh raiz Veiz Yinyiz hoiz)