Dahsau neix aen ndang reuxredred, bi neix ndaej 9 bi, bienx song diuz bwnyiengz ndaemndet raezrangrang, doiq lwgda ronghliklik, gwnz hangzgauq miz aen rei ndaemndet ndeu, dahsau neix couh dwg gou.

Gou gig gyaez yawj densi. Yawj seiz, gou youh bae daengz baihnaj densi yawj. Daxmeh heuh gou liz densi gyae di yawj, gou cijndaej naengh youq gwnz sahfaz yawj, hoeng baez yawj daengz mizyinx seiz, gou youh gikdoengh dwk ndwn hwnjdaeuj, lij diuq roengz sahfaz daeuj, yied yawj yied gyawj lo. Daxmeh hozndat dwk naeuz: “Mwngz caiq yienghneix yawj densi, yaek bienq baenz seiq aen lwgda lo, aeu daiq aen nganxgingq iq dem.”Gou riuhehe naeuz:“Daxmeh, mwngz yaeuh lwgnyez.”Daxmeh nyinhcaen naeuz:“Mbouj saenq, mwngz couh caj yawj mbat ndeu.”Seizneix gou doeg daengz sam nienzgaep, caen dahraix, gou daiq hwnj fouq nganxgingq iq lo, gyoengq doengzhag lij heuh gou dah “seiq da” ne. Vah bouxlaux cungj gangj: Mbouj dingq vah bouxlaux, gwnvei youq dangqnaj. Gou caen wngq gawq vah neix lo. Gou caen ienqloek, mbouj rox bae gizlawz bauq haeujhongx ha!

Gou lij gyaez diuqfoux. Youq ndaw ban dou suenq gou ceiq rox diuqfoux. Bi neix ciet 6·1, gou guh boux lingxfoux ndaw ban, hwnjdaiz byaujyenj seiz, daengx ciengz bouxyawj laj daiz bekfwngz yiengjfofo, ban dou ndaej daih’it mingz lo, daihgya cungj haenh gou.

Gou lij gyaez lienh aen ndangdaej, lumjbaenz diuq- cag ha, dwk binghbanghgiuz ha. Hagsib cingzsik youq ndaw ban hix mbouj it couh ngeih ne.

Neix couh dwg gou, daihgya nyienh caeuq gou guh baengzyoux lwi?

（lauxsae son’gyauq Cinz Cinhdonz/覃珍团）