Lwgvuengziq ninz ndaek gvaq, gou couh umj de haeuj ndaw rungj daeuj, laebdaeb byaijloh moq. Gou simraeuj lai, couh lumj umj gaiq bauj ndeu, doiq gou daeuj gangj, gwnz biengz neix mbouj miz gijmaz doxgaiq lij byot gvaq Lwgvuengziq dem lo. Youq laj ronghndwen, gou cim najbyak haunyo de, cim fouq lwgda laep de, cim byoemgyaeuj rumz boq mbinfofo de, gou gag naeuz: “Gou yawj ndaej raen baihrog ndwi, gij doxgaiq lai youqgaenj haenx yawj mbouj raen……”

Ndaej raen naengbak Lwgvuengziq ning geij mbat aj le couh rinnyumnyum, gou vubvubvebveb gag naeuz:“Boux Lwg- vuengziq ninz ndaek neix, de gyaez duj vameizgveiq de lai, couhsuenq de ninz ndaek gvaq, gaiq ngaeuz duj vameizgveiq de goj lumj aendaeng nei rongh hoenz de……gou simraeuj raixcaix.” Yienghneix, gou roxnyinh de engq nyomq dem lo. De couh lumj byaifeiz, rumz baez ci daeuj de couh ndaep lo, gou coj deng henhoh ndei de dahraix. Gou laebdaeb byaij baenaj, byaij daengz mbwnmomj seiz ra raen aen mboq ndeu lo.

Ngeihcib Haj

Lwgvuengziq naeuz:“Doenghboux vunz- hek naenghci de, doxcaenx haeuj ndaw cifeiz bae, hoeng gyoengqde mbouj rox yaek ra gijmaz nauq. Gyoengqde buet gwnz buet laj nyaengqnyatnyat, angqfwngfwng, baebae dauqdauq……”

De ciepdwk naeuz: “Gyoengqde mbouj hoj baenz neix guh ne, dwgrengz lai go.”

Aenmboq dou ra raen neix, mbouj lumj aenmboq ndaw Diegsa Sahhahlah. Aenmboq ndaw Diegsa Sahhahlah dwg youq ndaw sa vat aen congh ndeu ndwi. Aenmboq neix couh lumj aenmboq lajmbanj nei. Hoeng gizneix mbouj dwg lajmbanj bw, gou naemj gou coj dwg loqfangzbaenz dahraix……”

“Geizheih lai!” Gou naeuz Lwgvuengziq nyi, “Yienghyiengh doxgaiq cungj miz bw: Miz loek, miz doengj, miz cag……”

De riuhehe, gaem saenjcag, baenq aenloek. Aenloek couh yiengj ngetnget lumj gaiq biurumz gaeuq nanznanz mbouj miz rumz ci gvaq.

“Mwngz dingq vei!” Lwgvuengziq naeuz: “Raeuz hawj aenmboq neix ndiu moq, de guhfwen lo.……” Gou yaek mbouj hawj de gag boux dog bengq saenjcag dwgrengz lai. Gou naeuz de nyi:

“Hawj gou guh, hong neix naek lai.”

Gou menhmenh rag doengjraemx hwnjdaeuj, coq de youq bangxhenz. Gou ndaejnyi singfwen aenloek youq henz rwz gou yiengj liux yiengj moq, gou ndaej raen nditndat youq ndaw raemx ronghmyabmyab.

“Gou yaek gwn raemx.” Lwgvuengziq naeuz, “Hawj gou gwn di ndeu……”

Seizneix gou cingq rox de yaek ra gijmaz. （34）