Mwh hanzgya, gou bae ranzcoj lajmbanj yawj daxgoeng daxbuz baenz bi mbouj raennaj haenx, hawj gou liuh mbouj daengz dwg, ranz daxgoeng gingqyienz ciengx miz caet duz gaeqmeh, caemhcaiq gaenq hainduj okgyaeq lo.

Vihliux hawj gyoengq gaeq neix lai okgyaeq, gou yaek ganq ndei gij gaeqmeh neix. Gou moix ngoenz cungj bae gyanghongh geqgeq gij soqliengh gaeq neix, lij yaekaeu bauj aendou rongzgaeq hai dwk, fuengbienh gyoengqde okgyaeq. Gou lij dawz gij ndok moix baez gwn lw haenx dub mienz le, hoed youq ndaw haeuxgaeq gueng duz gaeqmeh geq gwn, maqmuengh gyoengqde maj ndaej bizbwdbwd bae.

Miz ngoenz ndeu haetromh, gou fatyienh duz gaeqmeh ndeu cingqcaih okgyaeq, gvaq aen cung ndeu, duz gaeqmeh neix numqnene byaij ok- daeuj lo, yienghneix, gou angqfwng- fwng buet gvaqbae nyaeb gyaeqgaeq, gou baez hai rongzgaeq, doeksaetyat, gingqyienz miz song aen gyaeqgaeq aen hung aen iq baij youq dangqnaj gou, aen iq haenx ngamq miz mehfwngz baenzhaenx hung. Gou hemqyatyat buet daengz dangqnaj daxbuz, dawz fwngz yo youq raeb- laeng, sing gok naeuz:“Mwngz nanq- nanq gou nyaeb ndaej geijlai aen gyaeqgaeq?” “Aen ndeu be.” Daxbuz riu naeuz, “Deng mbouj deng?” “Loek lo, dwg song aen. Duz gaeqmeh neix ak raixcaix!” Gou gaijcingq naeuz. “Caen dwg ha? Cungj saeh neix gig noix raen ho! Vaiq dawz gyaeqgaeq cuengq haeuj ndaw bat bae, gaej deng dek lo.” Daxbuz daengq gou. “Baenz ha!” Gou dingq vah dawz gyaeqgaeq mbaeumbengmbeng cuengq haeuj ndaw bat bae.

Sijsaeq baez geq, aen hanzgya neix, gou nyaeb ndaej bak lai aen gyaeqgaeq ne! Caen dwg soundaej rimmwdmwd!

(Gauh Cihyenz raiz； Goenggen hoiz)