Lwgvuengziq doiq gou naeuz:“Boux baengzyoux gou duznyaenma……”

“Lwgvuengziq oiq, seizneix lij gangj duznyaenma guhmaz ne.”

“Vihmaz mbouj hawj gangj lune?”

“Aenvih gou hozhawq yaek dai lo……”

De nyi mbouj rox gou gangj gijmaz, han naeuz:

“Couhsuenq yaek dai le, miz gvaq boux baengzyoux ndeu hix ndei lo, miz duznyaenma boux baengzyoux neix gou hix angqfaengz lai……”

“De lij mbouj rox mbouj miz raemx gwn dwglau baenzlawz bae.” Gou ngeix naeuz, “Aenvih de soqlaiz mbouj rox dungxiek roxnaeuz hozhawq gvaq, miz di nditndat cix baenz lo……”

De cim gou, guhlumj roxyiuj gou naemj gijmaz, liux cix han naeuz:

“Gou hix hozhawq gvaq……raeuz bae ra aen mboq ndeu vei……”

Gou simfanz raixcaix. Youq ndaw diegsa gvangqlanghlangh neix, yaek ra aenmboq, dwgrengz lai lo. Yienznaeuz rox dwgrengz lai, dou gojlij bae ra dem.

Geij aen cung gvaqbae liux, mbwn fuemx gvaq, ndaundeiq goj okdaeuj gvaq. Gou hozhawq daengz nohndat bae, ngiengx gyaeuj cim gwnz mbwn, lumjguh loq- fangzhwnz nei. Coenzvah Lwgvuengziq youq ndaw uk gou ndaeng bae ndaeng dauq.

“Mwngz goj hozhawq ga?” Gou cam de naeuz.

De mbouj han gou nauq, gag naeuz gou nyi ndwi:

“Raemx doiq sim ndei lai go……”

Gou mbouj rox de gangj coenz neix dwg gangj gijmaz, yienghneix gou goj mbouj guhsing, cam de goj mbouj miz yungh.

De baeg lo, naengh roengzdaeuj, gou ing de naengh roengzdaeuj. Gvaq yaep he, de youh naeuz dem:

“Ndaundeiq gyaeundei raixcaix, aenvih miz duj va yawj mbouj raen ndeu .”

Gou han de naeuz: “Wgo!” Gangj coenz neix sat le gou mbouj gangj dem lo, gag cim diegsa gvangqlanghlangh laj rongh- ndwen neix ndwi.

“Diegsa gyaeundei raixcaix.”Lwg- vuengziq naeuz dem.

Wgo! Diegsa gyaeundei raixcaix go! Gou hix gyaez diegsa go. Boux vunz dog naengh youq gwnz ndoisa, gijmaz cungj yawj mbouj raen, gijmaz cungj dingq mbouj nyi. Hoeng, seiqhenz cix mbouj rox miz gijmaz doxgaiq laeglemx migmyanz sagrongh youq.

“Diegsa gyaeundei baenzneix,” Lwg- vuengziq naeuz, “dwg aenvih youq mbangj giz miz aenmboq ndoj youq……”

Gou doeksaet lai, laegfwngh rox vihmaz diegsa migmyanz sagrongh lo. Gou lij iq seizde, youq ndaw aen ranz ciuhgeq ndeu youq, vunzlai riuz naeuz ndawde miz bauj. Yienznaeuz, mbouj miz saek boux vunz rox guhlawz ra ndaej bauj, mbangjbaez goj mbouj miz vunz bae ra gvaq. Hoeng, aenvih aen riuznaeuz neix, aenranz ciuhgeq cix saenzgeiz lai. Youq ndaw aenranz ciuhgeq ranz gou yo miz aen baexmaed ndeu……

“Wgo!” Gou doiq Lwgvuengziq naeuz, “Aenranz, ndaundeiq, roxnaeuz diegsa, aenvih gij doxgaiq yawj mbouj raen de cix engq gyaeundei lo.”

“Gou angqfaengz dangqmaz.”Lwg- vuengziq naeuz, “Mwngz caeuq duznyaenma gou naemj ndaej doxlumj.”（33）