Ngoenz ndeu, gou caeuq daxmeh bae youzraemx, yawjraen miz geij boux mehnax(dahnax) hawj bouxhek nyaenj ndang. Wnggai gig cwxcaih ba, nyaenj ndaej bouxhek cungj ninzndaek lo. Gou sim siengj: Daxboh daxmeh guhhong geijlai sinhoj ha, danghnaeuz gou hag rox dajnyaenj, couh ndaej bang vunz ranz nyaenj ndang lo.

Gou sijsaeq yawj mehnax(dahnax) guh moix aen dungcoz, daj gwnz mbaq nyaenj daengz laj din, lij aeu fwngz hag guh, swiq gyaeuj seiz gou lij mbouj lumz yawj, yaek lizhai seiz, youh caiq yawj geij da, mehnax(dahnax) raen gou yienghneix, cungj riu lo.

Ma daengz ranz le, gou dawz aen swiz dangguh boux vunz, hag yiengh mehnax(dahnax) dajnyaenj hwnjdaeuj. Daxmeh yawjraen le, ngauz gyaeuj riu dwk naeuz：“Dah lwg neix, lij hag ndaej gig nyinhcaen bw, caemhcaiq miz siengq miz yiengh dem. ”Dingq gij vah daxmeh le, gou ndaw sim geijlai diemz ha! Bingzciengz, gou baez ndaejhoengq couh lienh dajnyaenj, miz cinbu lai lo. Ngoenz ndeu, daxboh guhhong dauqma, aij youq gwnz sahfaz, gou sikhaek raix boi raemxgoenj ndeu hawj de gwn. Daxboh gwn raemx gvaq le, riu naeuz:“Dahlwg gvai, mwngz mbouj dwg hag rox hawj vunz dajnyaenj la? Daeuj bang daxboh nyaenjnyaenj ba!”Gou byaij gvaqbae, ndaw sim gig vueng, simdaeuz diuqfwgfwg, aenvih gou dwg daih’it baez hawj boux vunz nyaenj ndang. Daxboh boekbemq ninz youq gwnz sahfaz, gou sien nyaenj song mbaq, ciepdwk dub diuz gyanghwet, doeklaeng dub ga youh nyaenj din, daxboh heuh gou caiq yungh lai di rengz, gou youh daj song mbaq dub daengz song din, daxboh yaengx hwnj fwngzmeh haenh naeuz:“Ranz raeuz boux dajnyaenj iq gaeuq ciennieb bw! Hawj gou geijlai yiengjsouh ha！”Gou nyaenj ndaej fwngz cungj naet lo, hanh hix lae lo, hoeng, dingq gij vah daxboh le, gou youh miz rengz lo. Gou nyinhcaen dwk gwq dub gwq nyaenj, mbouj rox seizlawz, daxboh gaenq ninzndaek lo, gyaenfofo dwk. Daxboh, mwngz sinhoj lo, mwngz couh ndeindei ninz yaep ndeu ba.

Daj baez neix hwnj, gou ciengzciengz hawj daxboh daxmeh daxgoeng daxbuz dajnyaenj, daengx ranz vunz cungj haenh gou dwg boux lwgnyez roxsoq. Gou dingq le, ndawsim lumj gwn diengzrwi ityiengh, diemzsisi.

Gou hag rox dajnyaenj lo. Doengzseiz lij rox ndaej daengz： Hag gijmaz saeh cungj aeu miz naihsim. Dajnyaenj, hawj gou sim’angq, engq hawj daengx ranz vunz sim’angq.

（lauxsae son’gyauq Cinz Cinhdonz/覃珍团)