“Dinghlingling, Dinghling- ling……”Neix dwg sing gijmaz, cienz haeuj sim gou, couh lumj ndit daeng- ngoenz raeujrub, ndit lwenq da ciuq haeuj sim gou; aen seiqgyaiq saekcaij gyaeundei, moix boux vunz cungj ndaej ra gij sing swhgeij. Gou hix siengj hwnj gij sing swhgeij haenx, raeujrub youh gamjdoengh vunz.

Haenx dwg ngoenz banngaiz ndit ndathuhu ndeu, ndaw ranz caem- bywdbywd. Miz bog ndit ndeu daj gehcueng ciuq haeujdaeuj. “Daxmeh, daxmeh, ……” Gou gipgip muengz- muengz dwk ra daxmeh. Hoeng, daxmeh cingq ninz youq gwnz congz, lumj duzmou ityiengh gyaenhoho dwk ninzndaek ne, cungj mbouj leixlangh gou.

Sawqmwh, gyangmbwn byajmig myanmyan, byajraez yiengjhuhu, gou deng hwk lau raixcaix. Mboujguenj daxmeh lo, gou lumj mbin ityiengh buet ma ndaw rug, ndoj ndaw denz bae, daejngwngw hwnjdaeuj. Cingq youq seizneix, gij sing “Dinghlingling, Dinghlingling……”yiengj haeuj duj- rwz gou daeuj. A, dwg sing lingz soujgih daxmeh, aen sim diuqfwgfwg gou caemcingh roengzdaeuj lo. Ndaw ranz caemlwglwg, lij hawj gou lau saenz lau ndet. Dou hung hai lo, sim gou diuq ndaej engqgya vaiq lo, seizneix gij sing ndaw rug youh yiengj hwnjdaeuj lo. Aen sim gou mbouj caiq lau lo, lumjbaenz gij sing sim diuq hix dingq mbouj nyi lo.

“Mwngz youh guh gijmaz la?” Bakdou rug gou hai lo, gou mumj- mumj gyumqgyumq yawjraen aen ngaeuz gig sug ndeu. Yienznaeuz ndaw ranz cij miz gou caeuq daxmeh, hoeng, gou lij siengj mbouj dwg daxmeh. Daxmeh dwg gou dogdog ndaej baengh ha! Daxmeh mbouj vueng mbouj muengz byaij gvaqdaeuj.

De baez raen gij yiengh neix, sikhaek got gou haeuj ndaw rungj raeujrub bae.Daxmeh gangj, de iq seiz hix dwg yienghneix lau mbwn byajraez.Gwj gangj gwj gangj, aen sing youh yiengj hwnjdaeuj lo. Daxmeh yawjyawj gou, couh dawz aen soujgih cuengq henz ndang gou daeuj, gou menhmenh biek rungj daxmeh, mbouj caiq lau lo, bienq ndaej mbei hung lo. Dou dawz aen sing neix heuhguh “souj- hohsaenz”. Gangj dwk, gou caeuq daxmeh cungj riuhaha hwnjdaeuj, riu ndaej dungx cungj in lo.

Daj baez neix hwnj, “Dingh- lingling, Dinghlingling……” Gij sing neix itcig buenx gou, gaenq haj bi lo, de baenz boux doih’iq gou liz mbouj hai haenx.

（lauxsae son’gyauq Luz Ginj- genh/陆锦娟)