Gangj sat le de youh dauqbae henz ndang duznyaenma.

“Raen moq!” Lwgvuengziq naeuz.

“Raen moq!” Duznyaenma naeuz, “Ne! Neix couhdwg baexmaed gou: Aeu sim bae yawj cingq yawj ndaej seuq. Gijcaen aeu lwgda bae yawj yawj mbouj raen go.”

“Gijcaen aeu lwgda bae yawj yawj mbouj raen.” Lwgvuengziq riengz gangj coenz vah neix, yienghneix de cingq geiq haeuj sim bae.

“Couhdwg aenvih mwngz yungh seizgan lailai youq gwnz ndang duj vameizgveiq mwngz, duj vameizgveiq mwngz doiq mwngz daeuj gangj cingq youqgaenj baenzneix.”

“Gou yungh seizgan lailai youq gwnz ndang duj vameizgveiq gou……” Lwg- vuengziq riengz gangj coenz vah neix, yienghneix de cingq niemhhaeuj sim bae.

“Vunzlai senq lumz gvaq aen dauhleix neix lo.” Duznyaenma naeuz, “Mwngz gaej lumz de bae bw, mwngz deng dawzrap gij doxgaiq mwngz gunx gvaq haenx. Mwngz deng dawzrap duj vameizgveiq mwngz……”

“Gou deng dawzrap duj vameizgveiq gou.” Lwgvuengziq riengz gangj coenz vah neix, yienghneix de cingq niemh haeuj sim bae.

Ngeihcib Ngeih

“Gyanghaet ndei!” Lwgvuengziq dongx naeuz.

“Gyanghaet ndei!” Bouxmbekroen naeuz.

“Mwngz youq gizneix guhmaz ne?” Lwgvuengziq cam naeuz.

“Gou diuhdoh bouxnaenghci go! Baenz cien boux vunz guh buek ndeu.” Bouxmbekroen han naeuz, “Gou baij- soengq gij cifeiz coux gyoengqde haenx okbae, miz mbangj gvaq baihgvaz, miz mbangj gvaq baihswix.”

Seizneix, aen cifeiz daeng dawz ronghndongq ndeu hai gvaqbae fofo, sing gok dwk rwz yaek nuk bae, saenq aenrug’iq duh bouxmbekroen yaek doemqlak bae.

“Gyoengqde nyaengqnyatnyat bw!” Lwgvuengziq naeuz, “Gyoengqde nyaengq guh gijmaz ne?”

“Bouxhaici aiq goj mbouj rox ne.” Bouxmbekroen naeuz.

Aen cifeiz daeng dawz ronghndongq ndeu hai bae fofo coh baihdauqnyangz.

“Gyoengqde guhlawz youh dauq- daeuj lene?” Lwgvuengziq cam naeuz.

“Gyoengqde mbouj dwg gyoengq boux haxbaenh de go!” Bouxmbekroen naeuz, “Cifeiz neix mbangj hai doxbae, mbangj hai doxdauq go!”

“Biengz gaeuq gyoengqde youq mbouj habhoz ma?” Lwgvuengziq cam naeuz.

“Mbouj miz bouxlawz habhoz biengz gaeuq go!” Bouxmbekroen han naeuz.

(31)