Bakdou daxdaiq gou miz diuz dahsaw iq ndeu, ciengzseiz laesasa, yiengjfefe.

Ndaw dah miz gyoengq baeu cingq doxdwk, bya iq duzgungq cingq guh’angq. Bingzseiz, cungj miz lwgnyez youq ndaw dah gaeb bya, caemhcaiq moix baez cungj cangrim dauqma. Gij raemx diuz dahsaw iq liengzseuseu, diemzsubsub, gij vunz loh gvaq haenx cungj gvaqbae swiq naj, gwn raemx, youq henz dah yietnaiq.

Seizhah, ndataeng hoj dingx, gyoengq lwgnyez doih cungj saet roengz dahsaw iq bae bumbum, angqvauvau caemxraemx. Gou lij duet haiz, Siujdingh gaenq caeux couh saet roengz raemx bae, lumj duz byanouq ityiengh youz dwk angqvuedvued. Laeqbiz mbouj gamj saet roengzbae, Siujdungh baez nyoengx de, “budung” sing ndeu, Laeqbiz doek roengz raemx bae lo, raemx sinz rim fajnaj gou, daihgya cungj got dungx riuhaha. “Gaej doengh!” Laeqbiz naeuz, “laj dungx gou miz duz bya ndeu!” Daihgya angqfaengfaeng, cungj youz gvaqbae nyoengx deuz Laeqbiz. Bya deuz lo, Laeqbiz hemhyatyat. Daihgya cingq guhcaemz ndaej angq raixcaix, aenmbwn mbouj coh vunz. “hunglunglung” byajraez baez rongx, doek fwn lo. Fwnbyaj doek ndaej vaiq, bae cix vaiq. Fwn gvaq le, hoengheiq daegbied singjsien. Baezneix diuz dahsaw iq engqgya gyaeundei! Raemxdah sawrikrik, gij rinreq laj dah raen ndaej yienhsag. Daj gyae muengh bae, couh lumj diuz sienqngaenz utngeuj ndeu laesese, youh lumj fajfwed gyaeundei duz funghvuengz saetmbenmben. Dahsaw iq youq nditndat rubluh baihlaj, riu dwk diemzsubsub……

Dahsaw iq lij lumj laeq lwgnyez vuedbued youh cabheiq ndeu, youq ndaw goliux buet bae buet dauq, angqfwngfwng. It loh, de fandingq- daeuj raeuzrwdrwd, lumjbaenz giekcouj ndaw heiq ne angjndiengq gij bonjsaeh bonjfaenh. Dahsaw iq fatok gij sing sep rwz ndei dingq, sinz hwnj gij naedraemx sawrikrik, lumjbaenz gag ciengq gij go ndeidingq haenx, lumjbaenz gij diuqfoux angqyangz haenx.

Dahsaw iq, mwngz dwg gij saenzcingz ceiq dijbauj, ceiq cinghseuq daswyenz soengq hawj dou haenx, gou ciengxlwenx lumz mbouj ndaej mwngz!

( Sez Cuiginz raiz； Goenggen hoiz)