De miz doiq lwgda ronghliklik, aen ndaeng sangsang, de bingzciengz gyaez daenj doiq haiz genjsang, geu vunjhau, yawj hwnjdaeuj aen ndang reuxredred, de couh dwg lauxsae son ban dou suyoz——Cinz lauxsae.

Yienznaeuz Cinz lauxsae bingzciengz doiq dou gig yiemz, hoeng de dwg vih dou ndei. Geiq ndaej miz baez ndeu, hwnj goq suyoz,Cinz lauxsae daez ok aen vwndiz ndeu heuh dou hoizdap, haujlai doengzhag yaengxfwngz siengj hoizdap, gou sim siengj: Danghnaeuz gou mbouj yaengxfwngz, gyoengq doengzhag itdingh riu gou. Yienghneix, gou hix mbeihung dwk yaengxfwngz hwnjdaeuj lo. Aenvih gou mbouj dwg moix baez lauxsae cam cungj yaengxfwngz, ndigah lauxsae yawjraen gou yaengx fwngz couh heuh gou ndwn hwnjdaeuj hoizdap. Gou dingqnyi lauxsae heuh, simvueng dwk ndwn hwnjdaeuj, ajbak baenz buenqngoenz cungj dap mbouj ok, gyoengq doengzhag cungj daengxda yawj coh gou, gou najmong dwk ngaem gyaeuj roengzbae, lauxsae cijndei heuh gou naengh roengzdaeuj.

Roengzdangz le, Cinz lauxsae byaij daengz henz ndang gou,laeglemx cam:“Daxbaenh mwngz yaengxfwngz hwnjdaeuj vih maz mbouj guhsing ha?”Gou youh naj hoengz lo, saeqsing naeuz: “Haujlai doengzhag cungj yaengxfwngz hwnjdaeuj, gou lau daihgya riu gou huk, ndigah hix gaen dwk yaengxfwngz hwnjdaeuj lo.” Cinz lauxsae sing unq doiq gou naeuz:“Baezlaeng mwngz rox dap couh yaengx fwngz swix, mbouj rox dap couh yaengx fwngz gvaz. Neix dwg aen mimiz song boux raeuz bw.” Gou dingq le gig gamjdoengh, gou laihnaeuz Cinz lauxsae aeu naeuz gou diuqbeiz, guhluenh goqdangz, yaek bihbingz gou mbat ndeu ne, siengj mbouj daengz lauxsae gig aeu naj gou, gou gietsim aeu ndeindei hag- sib, ngoenzngoenz doxhwnj.

Cinz lauxsae,mwngz sinhoj lo, docih mwngz! Gou itdingh mbouj hawj mwngz saet- muengh.

（lauxsae son- gyauq Cinz Cinhdonz/覃珍团)