Daj daxmeh seng dahnuengx le, gou hix lai boux doih ndeu lo. Mizseiz gou haengjheiq de, mizseiz gig yiemzmbwq de.

Dahnuengx bineix song hop lo, aen ndang de iqetet, gig cangqheiq; aennaj de luenzluq, bizbwdbwd, caen dwggyaez; gij byoem de unqnemnem, daenj aen mauh saekhoengz, gig ndeiyawj. Aenvih dahnuengx gou gig gyaez daej, ndigah gou heuh de guh “laeq daejnyah”, cehda “laeq daejnyah” mbaeqmbedmbed, yawj hwnjdaeuj dwggyoh riri.

Dahnuengx gou mboujdanh dwg “laeq daejnyah”, lij dwg “laeq cabheiq” dem.

Geiq ndaej miz baez ndeu, gou cingq raiz cozyez, de sawqmwh roemx haeuj funghranz gou daeuj, itcig beng dawz diuz buh gou. Gou baez ngeux gyaeuj, mbouj siujsim bungq deng raemxmaeg laemx lo, hoeng de lij riuhihi, rag gou haeuj laj daiz bae “rwed” raemxmaeg. De lij buet bae lwnh daxmeh nyi, naeuz: “Daxmeh, dahcej deng raemx- maeg bok lo.” Gou uet seuq raemxmaeg le, daxmeh lij ndaq gou yaep ndeu, deng ndaq le, gou utheiq raixcaix, dahnuengx cix youq laenghenz “caegriu”. Gvaq yaep he, gou bae ra de, ngaemgyaeuj cam vihmaz yienghneix guh? De mboujdanh mbouj han, dauqfanj swnh gou ngaemgyaeuj seiz, lienzmuengz bongx aen gyaeuj gou geij baez. Bongx dwk “bobobbob” yiengj. Gou vaiqdi bae gyaep, de cix dawz aen’eij nyoengx laemx, dawz aendaiz nyoengx ngeng, de lij buet bae hwnh daxmeh nyi. De ya, gangjgyaj naj cungj mbouj hoengz saekdi, de caen rox cang lo. De naeuz: “Daxmeh, dahcej haxbaenh yawj densi, yawj dwk fatheiq, couh nyoengx laemx aen’eij, nyoengx ngeng aendaiz, caemhcaiq lij gyaep hoenx gou.” Gou utheiq naeuz: “Daxmeh, mwngz gaej saenq gij vah dahnuengx, de gangjgyaj.” Daxmeh mbouj saenq, coenz vah cungj mbouj naeuz.

Gou youq ndaw fuengz naemj aen fuengfap ndeu, dawz gij vah dahnuengx bik okdaeuj. Ca mbouj geijlai gvaq le song aen cung, dahnuengx dauqdaej nyinhloek lo, daxmeh naeuz: “Mbouj youqgaenj, cijaeu gag rox nyinhloek couh dwg lwgnyez gvai.” Gou hix mbouj caiq roxnyinh utheiq lo.

Yienznaeuz dahnuengx gig manz, gig gyaez daej……Hoeng de dwg boux vunz youq ndaw sim gou ceiq youqgaenj ndeu.

(Vuz Ginhsez raiz Goenggen hoiz)