“Gou yaek daej lo.” Duznyaenma naeuz.

“Dwg mwngz loeng gvaq bw.” Lwgvuengziq naeuz, “Gou mbouj siengj hawj mwngz inhaemz, dwg mwngz hawj gou gunx mwngz go……”

“Wgo! Naeuz ndaej deng!” Duz- nyaenma naeuz.

“Hoeng mwngz seizneix yaek daej lo.” Lwgvuengziq naeuz.

“Wgo!” Duznyaenma naeuz.

“Nyaenx gunx mwngz miz gijmaz yungh ne!”

“Goj miz yungh go.” Duznyaenma naeuz, “Aenvih saek nazmeg.”

Gangj liux de youh laebdaeb gangj dem:

“Bae yawjyawj doenghgij vameiz- gveiq de mbat dem vei! Daengz seizde mwngz cix rox duj va mwngz ndei doh lajmbwn lo. Mwngz dauqdaeuj caeuq gou doxbiek seizde, gou cix soengq aen baexmaed ndeu hawj mwngz guh laex.”

Yienghneix Lwgvuengziq cix bae yawj doenghgij vameizgveiq de.

“Gyoengqsou mbouj lumj duj vameizgveiq gou saek di nauq.” Lwgvuengziq doiq gyoengqde naeuz, “Mbouj miz saek boux vunz gunx gvaq gyoengqsou, gyoengqsou goj mbouj gunx gvaq saek boux vunz. Gyoengq- sou cix lumj gou baeznduj yawjraen duznyaenma. Seizde duznyaenma caeuq ciencien fanhfanh duznyaenma wnq doxlumj. Hoeng, seizneix gou caeuq de gap baengzyoux gvaq, yienghneix de cix ndei doh lajmbwn, caeuq duzwnq mbouj doxlumj lo.”

Doenghgij vameizgveiq de ndaej nyi liux ndaw caw youqyak dahraix.

“Gyoengqsou yienznaeuz gyaeu- ndei lai, hoeng goj hoengqhaw lai.” Lwgvuengziq laebdaeb naeuz dem, “Mbouj miz vunz nyienh vih sou bae dai. Mbangjbaez, bouxgvaqroen rox laihnaeuz sou caeuq duj vameizgveiq gou doxlumj. Hoeng, duj vameizgveiq gou ndei gvaq gyoengqsou lailai. Aenvih de dwg gou rwed raemx; dwg gou coq de haeuj ndaw habgingq bae; dwg gou aeu doudangq henhoh de; dwg gou gyaemj de gaj duznonnyaiq gwnz ndang de bae(lw song sam duz hawj gyoengqde bienqbaenz duzmbaj ndwi); gou nyi de damzbyoedbyoed, nyi de gangjbetbet, vanzlij de mbangjseiz mbouj guhsing nauq, gou goj guh bouxnyi de, aenvih de dwg duj vameizgveiq gou go!”(30)