Daxmeh gou dwg boux nungzminz, bi neix ndaej 36 bi lo. De louz byoemgyaeuj dinj, de naeuz yienghneix ndei swiq ndei roi, mbouj nguhhong.

Daxmeh gou gig gaenx guhhong. Bineix gvaqcieng le, daxboh iu daxmeh bae Gvangjdungh ra cienz, naeuz youq mbanjranz guh hongnaz hongreih sinhoj lai, youh mbouj ndaej cienz. Daxmeh naeuz:“Song boux bouxlaux ndang nyieg youh geq, lwgnyez lij iq, ndek mbouj ndaej ha!”Yienghneix, daxboh gag bae Gvangjdungh lo. Daxmeh cijndei swhgeij youq ranz guh nazreih, gag boux ndeu ciuqgoq daxgoeng daxbuz caeuq gou.

Moix ngoenz mbwn caengz rongh,daxmeh couh hwnqcongz cawj cuk, yienz- haeuh couh dajsaeg, caj gou hwnqcongz seiz, youh langh cuk hawj gou gwn, soengq gou bae hagdangz dauqma le, couh rag civaiz bae guhhong lo. Daengz hong nyaengq seiz, daxmeh youh gvej haeux, youh sou duhdoem, nyaengq baenz hanh lae hanh roenx. Gou yawjraen daxmeh hanh ndik buhvaq cungj dumz lo, couh daek vanj cuk daeuj hawj de gwn, lij gaem diuz cukbaq daeuj, sim’in naeuz:“Daxmeh, mwngz sinhoj lo, cingj naengh roengzdaeuj gwn cuk,yietbaeg yaep ndeu ba! Gou bang mwngz beiz liengz yaep ndeu.”Daxmeh naeuz:“Docih dahlwg lo,gij haeux neix ngamq fad okdaeuj, aeu gibseiz daeh hwnj laeuz bae dak bw!” Gangj sat, daxmeh ndoet vanj cuk sat, youh gipmuengz bae dak haeux lo.

Neix couh dwg daxmeh gou, de mboujdanh gaenx guhhong, lij gig simsienh, doiq daxgoeng daxbuz gou cungj mbouj miz coenz vah naek gvaq.

Gou gyaez daxmeh gou!

(lauxsae son’gyauq Cinz Cinhdonz/覃珍团)