“Nyaenx gou guhlawz guh ndei ne?” Lwgvuengziq cam naeuz.

“Mwngz deng miz naihsim cij ndaej bw.”Duznyaenma han naeuz, “Mwngz naengh youq ndaw byoznywj gonq, naengh gyae gou di. Gou da cim mwngz, mwngz gijmaz cungj gaej gangj. Gangj lai cix bakbamz lo. Mwngz ngoenzngoenz cix naengh daeuj gyawj gou di……”

Ngoenz daihngeih, Lwgvuengziq daeuj moq lo.

“Mwngz ngoenzngoenz caemh seiz- haenx daeuj lai ndei.” Duznyaenma naeuz, “Langhnaeuz mwngz banringzgvaq seiq diemj daeuj, gou banringzgvaq sam diemj cix angqvauvau youq gizneix caj mwngz. Yaek daengz seiq diemj le, gou cix lai angq dem. Daengz seiq diemj le, gou couh diuqbaegbaeg, angq baenzcawz baenzcix. Langhnaeuz mwngz yaek seizlawz daeuj cix seizde daeuj, yienghneix gou cix mbouj rox guhlawz coux mwngz lo……Deng miz di laehgvenq lai baenz lai ndei.”

“Laehgvenq dwg gijmaz?” Lwg- vuengziq cam naeuz.

“Vunzlai ciengzseiz lumz gijneix bae.” Duznyaenma naeuz, “Laehgvenq couhdwg hawj mbangj ngoenz caeuq ngoenz wnq mbouj doxlumj, hawj mbangj seiz caeuq seiz wnq mbouj doxlumj. Lumjnaeuz, bouxdwknyaen miz laehgvenq bouxdwknyaen. Gyoengqde baez daengz singhgizseiq cix caeuq gyoengq lwgsau gyoengq najmaeq ndaw mbanj loenghfoux. Yienghneix, doiq gou daeuj gangj, singhgizseiq couh baenz ngoenzndei lo, gou youzlangh liuhlah bae daengz suenmakit goj mbouj lau. Langhnaeuz gyoengq bouxdwknyaen yaek seizlawz caeuq lwgsau bae loenghfoux cix seizde bae loenghfoux, ngoenzngoenz cungj yienghneix guh, gou cix ciengxlwenx cungj mbouj miz ngoenzlanghgyaj lo.”

Yienghneix, Lwgvuengziq cix gunx ndaej duznyaenma gvaq. Gvaq mbouj nanz Lwgvuengziq cix yaek deuz lo……

(29)