Moix baez yawjraen gij hoenz ndaw daemz nyapnyaj laeng hagdangz coemh hwnj, baihnaj gou couh yienh gij yienghsiengq Lanz lauxsae youq henz daemz nyapnyaj muengz haenx.

Yozyau dou youq lajmbanj, cawqleix nyapnyaj mbouj lumj ndawsingz fuengbienh, aenvih nyapnyaj mbouj ndaej gibseiz cawqleix, ngoenz gya ndwen lai, nyapnyaj ndaw daemz daeb ndaej lumj goengqbya, moix baez miz rumz hung ci daeuj, nyapnyaj couh lumj duz mbungqmbaj ityiengh youq byongh mbwn diuqfoux, sanq ndaej gizgiz cungj miz.

Lanz lauxsae daeuj daengz yozyau dou, couh fatseng daih bienqvaq. Daegbied dwg daemz nyapnyaj, gij nyapnyaj ndaw daemz haenx menhmenh fatseng bienqvaq. Lanz lauxsae ciengzciengz youq henz daemz okyienh, de roxnaeuz youq seiz doeg saw, roxnaeuz youq seiz banringz yietnaiq, roxnaeuz youq seiz cuengqhag le, cungj dwg boux vunz dog gaem dawz gaiqgyauz、faggimz raez gip nyapnyaj daehsuliu、ceijvaih、nyefaex daengj, couh faen loih cawqleix. Goengfou mbouj vei vunz mizsim, ginggvaq aen singhgiz ndeu haenqrengz, Lanz lauxsae dauqdaej dawz aen“baujleij” nanz gung haenx gung loemq lo. Doeklaeng, mboujlwnh hwnj rumz doek fwn, hix mbouj miz nyapnyaj youq byongh mbwn mbinfwfw,ndaw hagdangz seizseiz seuqsat ndeiyouq.

Seizneix, Lanz lauxsae mbouj youq yozyau dou sonsaw lo, hoeng daemz nyapnyaj hagdangz dou hix mbouj miz nyapnyaj daeb ndaej lumj goengqbya ityiengh lo. Aenvih daemz nyapnyaj ciengzciengz miz vunz lumj Lanz lauxsae ityiengh youq giz haenx muengz, dwg Lanz lauxsae dawz aensim cawqleix nyapnyaj haenx ciengzsoengq roengzdaeuj.

Lanz lauxsae, seizneix mwngz lij ndei lwi? Dou gig niemh mwngz.

（lauxsae son’gyauq Luz Cunhmeiz/陆春梅）