Geiq ndaej ngamq daengz yalingyingz ngoenz daihngeih. Banhaet lienh ndang sat, gyaulen heuh dou daengz ranzhaeux lohdien haenx doxcomz. Hoeng daengz gizhaenx baez yawj, ngawzngwd lo, laxlawz ngaizromh yaek swhgeij gag cawj! Hangh daih’it couh dwg cien gyaeqgaeq. Gyaulen heuh gou sien youq ndaw rek raix di youz ndeu, naeuz caj youz ndat le couh dub gyaeq roengzbae. “Dub roengzbae? Baenzlawz dub ha?” Gou cingq ngawzngwd, couh dingqnyi henz ndang miz vunz hemq: “Vaiq dub gyaeq, youz ok hoenz lo.” Hoeng gou mbouj rox gyaeq baenzlawz dub, gou luenhlulu dawz gyaeq lienz byuk itheij gveng roengz rek bae, caenh dingqnyi gij sing bibi baba, gij hauxgyaeq daj ndaw geh byukgyaej rih okdaeuj haenx, yaepyet couh dek lo, gou bae lawz raen gvaq yiengh hong neix, hwk dwk gvenggvak gucanj, saet daengz henzlaeng bae, “Ha ha ha……” Daxbeix hung henz ndang riugokgok.

Baez neix, gyaulen rag gou gvaqbae: “Mwngz yawj ndei!” De doq gangj doq raix youz roengz rek bae, deq youz ok hoenz, couh dawz gyaeqgaeq youq henz rek baez dub, song fwngz baez mbek, baenz aen hauxgyaeq doq conj roengz rek bae, gou cungj caengz ndaej yawj cingcuj, gyaulen gaenq dawz aen gyaeqcien ndeiriri haenx canj ok rek lo. Daengz gou cien lo, baez neix gyaulen heuh gou dub gyaeq roengz vanj iq bae gonq, hoeng baeznaengz aen gyaeqgaeq dwggyaez neix seizneix cix gig diuqbeiz, mbouj dingq vah gou saekdi, dub mbaeu di, mbouj dek, dub naek di, youh deng gou nyaenj ndaej yungzyab. Gou naiqnueknuek naeuz: “Mbouj gwn lo.” “Mbouj ndaej, neix hix dwg hangh yinvu haglienh he.” Gig mbouj yungzheih, gou dauqdaej dawz “aen gyaeqnyangq neix” dub roengz vanj bae lo, hoeng dang gou raix gij hauxgyaeq roengz rek bae seiz, ndaw rek youh dek bidbid byadbyad, youzndat sinx hwnjdaeuj log dawz faj fwngz gou. Gyaulen aeu sujbaq daeuj suek faj fwngz gou, heuh gou caiq dawz hauxgyaeq riengz henz aenrek raix roengzbae, mbouj siengj daengz aen banhfap neix caen mbouj loek. Gou lumz caez gij dungxcieg haxbaenh, youz gyaulen sonyinx le dauqdaej guh baenz “gyaeqgaeq cien” baez daih’it lo!

Gou hag rox cien gyaeqgaeq, ndawsim gou angq raixcaix.

(Cuz Haijliengz raiz Goenggen hoiz)