Sai:

Ngeih sam nyied ndaem ho,

Baenz go mbouj baenz gyaeuj,

Cib nyied vunz sou haeux,

Gou bae aeu goenq fiengz.

Mbwk:

Vunz ndaem mwngz doengz ndaem,

Caemh cingq ndaej doengz sou,

Vunz ndaem mwngz hoengq youq,

Seizcou sou gijmaz?

Sai:

Naz raih gwnz raih laj,

Gij go’gyaj gou ndaem,

Go baenz go mbouj baenz,

Nuengx naeuz baenzlawz guh?

Mbwk:

Gij go’gyaj mwngz ndaem,

Hix aeu rox buenzsuenq,

Ciuq gohyoz daeuj guenj,

Luenh guh vaih gomiuz.

Sai:

Ndaem haeux mbouj ndaej sou,

Gou gaij ndaem makgai,

Ndaem mak mbouj guenj lai,

Mbouj yungh ndai cae naz.

Mbwk:

Mbouj yungh ndai cae naz,

Beix cengq da luenh naeuz,

Danghnaeuz sim mbouj haeuj,

Mak aeu dai byaiz doh.

Sai:

Ndaem hwnj le caiq ndai,

Miz geijlai rengz ok,

Gag gou boux vunz dog,

Ndaej ok geijlai rengz?

Mbwk:

Beix mwngz ndaem makgai,

Goq vunzlai daeuj guenj,

Yaek aeu rox buenzsuenq,

Guenj ndei mak cij baenz.

Sai:

Ndaw daeh mbouj miz ngaenz,

Baenzlawz goq ndaej vunz,

Guh ngamq ndaej gaeuq gwn,

Mbouj cwnh saek faen lawz.

Mbwk:

Nuengx caeuq beix doxyaeng,

Daengz ngaenzhangz ciq gonq,

Goq vunz bae gaj non,

Ok bonj cij miz leih.