Mbanjranz gou dwg aen mbanj iq youq Vujmingz. Mbanjranz gou bya gyaeu, raemx gyaeu, vunz engq gyaeu. Daegbied dwg gaijgwz hailangh 40 bi neix daeuj, mbanjranz gou bienqvaq hungloet, ndaw mbanj bienq gyaeu bienq seuq lo, lwgminz cungqvunz haujlai cungj bienq fouq lo, ranzranz cungj miz gwn miz daenj, mbouj lau dai iek, haujlai ranz cungj hwnq le ranzlaeuz, cawx miz ciiq dem.

Goengq bya mbanjranz gou aen daeb aen, aen hung riengz aen iq. Daj gyae yawj bae heuswdswd, miz geij goengq bya iq mumjmumj gyumq- gyumq yienh youq ndaw fwj ndaw mok, gig ndeiyawj, gij goengq bya humx aen mbanjranz gou, lumjnaeuz daxboh mbehai song fwngz got lwgnyez nei, “lwgnyez” youq ndaw rungj “daxboh” gig vuenyungz!

Raemx mbanjranz gou hix gig gyaeundei. Youq aen mbanj baihbaek, miz aen suijgu hungloet gvangqlangh ndeu, seiqhenz cungj dwg faex, raemx sawdikdik, faex heuswdswd, aen fai daj laj doxhwnj hwnjbae raezrangrang. Gyoengq lwgnyez cungj maij daeuj daengz gizneix guhcaemz, buet bae buet dauq, sing riu sing heuh saekrim song rwz. Geij bi neix daeuj, miz vunz youq henz suijgu guh nungzgyahloz, aenvih funghgingj gig gyaeundei, miz gwn miz caemz, baez daengz couhmoz roxnaeuz cuengqgyaj, couh miz haujlai vunz ndawsingz baenz ranz baenz ranz roxnaeuz baenz bang baengzyoux daeuj youz. Ndaw mbanjranz nauhyied dangqmaz, hix hawj gij souhaeuj vunzmbanj ndaej demlai.

40 bi daeuj, lwgminz cungqvunz cungj caencaen yiengjsouh daengz gij ndeicawq gaijgwz hailangh, bouxboux gaenx guhhong, miz gwn miz daenj, doxndiep doxgyaez, doxbang dox- coengh, bouxboux ngoenzngoenz riu- nyumnyum, mbouj doxceng doxhoenx. Mbanj gou ranzranz cungj hwnq le ranzlaeuz, mizmbangj hwnq song caengz, mizmbangj hwnq sam caengz, ranz cungj cang ndaej gig ndei, ndawranz cungj dem miz densi、binghsiengh、gunghdiuz daengj gyah- den, ngoenzngoenz gvaq ndaej onjdup.

Baenzlawz yiengh? Dingq gou gaisau mbanjranz gou le, daihgya dwg mbouj dwg cungj siengj bae mbanj- ranz gou yawjyawj ne? Angqcoux daihgya daeuj mbanjranz gou!

Gou gyaez mbanjranz gou.