Baihnaj aen suzse dou miz aen suenmak iq ndeu, ndaem miz geij go makdauz makmaenj, hoeng dou cungj mbouj haeujsim geij go haenx mwhlawz dawz mak.

Ngoenz he gou youq gwnz dingjranz dak denz, rumzhaenq bongj mbaw denz gou doek roengz ndaw suen bae, venj youq nga faexmak- maenj he. Mwh cuengqhag haeujbae duengj aeu denz dauq, sawqmwh yawjraen ndaw mbawfaex miz maz doxgaiq luenzlulu. O, dwg gij aen makmaenj bw! Sikhaek myaiz couh yaek conh lo, gou haujlai nanz mbouj ndaej gwn makmaenj gvaq lo. Danghnaeuz youq ranzmbanj, gou itdingh mbaet baenz daeh dawz ma geb guh baenz soemj, gwn makmaenj geb soemj ndaej siu ndat ne! Hoeng, seizneix youq Baekging, Baekging mbouj raen miz maz vunz gwn gijneix, daengx aen gingsingz hix mbouj raen miz vunz gai, siengj gwn hix cij ndaej siengj ndwi. Siengj mbouj daengz ndaw hagdangz cix miz makmaenj.

Gou mbouj gamj mbaet aeu lwg- maenj ma gwn, cijndei gwed denz dauqbae.

“Gyoengq beixnuengx! Ndaw suen iq miz makmaenj!” Gou angq dwk coh doengh boux doengzhag caemh rug haenx naeuz. Gyoengqde cungj dwg daj baihnamz daeuj, cungj ngah lwgmaenj, sikhaek bibi bedbed doxyaeng yaek baenzlawz caeg aeu.

“Raeuz bae ndomq cinj gonq, gyanghaemh cij bae mbaet!”

“Doengxngoenz vunz byaij lai, hawj vunz yawjraen couh deng ngeiz ha.”

“Ei——Yienghneix raeuz couh daj aen cueng vut gik haiz roengzbae, cang yiengh haeujbae gip haiz baenz mbouj?” Boux he ngvanh ok diuz cawjeiq neix daeuj.

Daengx aen rug fwd dinghrwdrwd roengzdaeuj.

Yienznaeuz banhfap neix hix mbouj suenq loek, hoeng byawz hix mbouj nyienh guh, lau vunz ngeiz saetlaex! Ndigah bouxboux cungj haep bak cang ngoemx.

Caem haujlai nanz le, boux mbeilaux he gag naeuz:“Aeya, yienghneix gou bae nw! Baenz le lai hawj gou saek song aen makmaenj gwn couh ndaej lo!” Bouxboux cungj ngaekgyaeuj dwddwd naeuz ndaej le, de couh hai cueng vut haiz, enj aek byaij ok aen rug, lumj boux gwzming lezsw byaij coh dieggajvunz nei.

Yaep ndeu, cij raen de ciuq giva song da baenqlulu doeng ndomq sae ndomq cangguh yiengh ra haiz. Saek song faencung le, de couh cacoemj buet ma. Sikhaek miz vunz bae gven dou ndei cam naeuz:“Baenzlawz yiengh baenzlawz yiengh!” Gyoengq- dou mbouj rox fatseng maz saeh, simgip baenzlai. De mbouj gangj coenz, gaem hwnj cenj raemx ndeu, menhmenh ndoet, caen dwgcaengz.

Deq de gwn raemx gaeuq, dauqdaej nyienh gangj:“Ndaw suen makmaenj cij miz go ndeu miz mak, mbouj suenq lai, ngamqngamq gaeuq raeuz gwn donq he.” Dingq sat ndaw rug bouxboux hemqhuhu hwnjdaeuj, miz di saetmuengh. De youh laebdaeb gangj naeuz:“Hoeng, gogo makdauz cungj miz mak gig lai, demq yawj saek song aen singhgiz couh yaek cug lo! Lij miz go hwzdauz he, mwhneix dawz miz haujlai lwgmak iq, daengz haggeiz baihlaj couh gwn ndaej lo!” Dingq naeuz lij miz makdauz caeuq mak- hwzdauz, dou youh angqvauvau.

Baenzneix, dou nyinhnaeuz ndaej gwn donq makmaenj hix beij mbouj ndaej gwn ndei, baezneix caeg makmaenj gonq. Mbwn laep dingh, dou caenh hawj boux ngamq bae ndomq gvaq haenx caeuq boux he bae mbaet mak. Lau vunz bae lai yungzheih deng bouxwnq rox!

Song boux de couh riengjret bae le, dou youq ndaw fuengz cingjleix aen daiz ndei, bwh raemx、gyu、dangz. Mbouj daengz aen roetgyaeq nanz makmaenj couh caeg dauq lo. Daengx rug angqyangyang, youh ciengq youh diuq lumj gvaq ciet nei.

Yienznaeuz makmaenj mbouj lai, hoeng, faenh simcingz neix gig nanz ra ha.