De naemj yaep ndeu, youh cam naeuz dem: “Gunx dwg gijmaz ne?”

“Mwngz mbouj dwg vunz gizneix ma?” Duznyaenma naeuz, “Mwngz daeuj ra gijmaz ne?”

“Gou daeuj ra vunz.” Lwgvuengziq naeuz, “Gunx dwg gijmaz ne?”

“Vunz,” Duznyaenma naeuz, “vunz miz fagcungq, gyoengqde dwknyaen, gyoengqde dwglau lai. Gyoengqde goj ciengx duzgaeq, mwngz daeuj ra duzgaeq, dwg lwi?”

“Gou mbouj dwg daeuj ra duzgaeq!” Lwgvuengziq naeuz, “Gou daeuj ra baengz- youx. Gunx dwg gijmaz ne?”

“Vunzlai senq lumz gijneix lo.” Duz- nyaenma naeuz, “Gunx couhdwg doxlienz baedauq.”

“Doxlienz baedauq?”

“Wgo!” Duznyaenma naeuz, “Doiq gou daeuj gangj, mwngz dwg lwgmbauq iq, caeuq lwgmbauq iq wnq mbouj miz gijmaz mbouj doxlumj. Gou mbouj aeu mwngz, mwngz hix mbouj aeu gou. Doiq mwngz daeuj gangj, gou dwg duznyaenma ndeu, caeuq nyaenma wnq caemh mbouj miz gijmaz mbouj doxlumj. Hoeng, langhnaeuz mwngz gunx gou le, gou mbouj ndaej mbouj miz mwngz, mwngz mbouj ndaej mbouj miz gou.”

“Gou rox lo.” Lwgvuengziq naeuz, “Miz duj va ndeu, de gaenq gunx gou gvaq……”

“Youq gwnz deihgiuz saeh gijmaz cungj miz.” Duznyaenma naeuz.

“Mbouj dwg youq gwnz deihgiuz neix bw.” Lwgvuengziq naeuz.

Duznyaenma gamjdaengz geizheih lai.

“Youq gwnz aen singgiuz wnq?”

“Wgo!”

“Aen singgiuz de, miz bouxdwknyaen lwi?”

“Mbouj miz ne!”

“Va! Ndei lai lo! Nyaenx miz duzgaeq lwi?”

“Mbouj miz go!”

“Ai! Lajmbwn neix mbouj miz saek yiengh cungj ndei liux caez.”Duznyaenma gyangzheiq naeuz.(27)