Youq ndaw uk gou, miz haujlai haujlai saeh gaxgonq, gyoengqde lumj gij bya iq ndaw daihaij ityiengh, ciengzseiz youq ndaw uk gou youz bae youz dauq. Miz gienh saeh iq ndeu hawj gou daengz ngoenzneix cungj nanz lumz ndaej.

Gou dwg bouxndaengj ndeu, ciengzseiz youq ndaw hagdangz cauhhux. Miz baez ndeu roengzdangz lo, gou dawz aen lamzgiuz youq gehhongh sam laeuz hagdangz bek guhcaemz, yawjraen aen lamzgiuz danh ndaej baenz sang, gou sawqmwh miz aen naemjfap geizheih he: Aen lamzgiuz nei daj sam laeuz doek roengzbae itdingh danh ndaej engq sang. Yienghneix, gou dawz lamzgiuz haenqrengz coh laj laeuz ndek roengzbae, aen giuz haenx lumj caqdanq ityiengh doek roengzbae, va! Giuz danh ndaej caen sang a! Gij doengzhag baihlaj cungj doeksaetyat, hoeng gou roxnyinh gig mizyinx, doq gag riuhaha.

Yi! Caen dwg angq gvaqmauh bienqbaenz siengsim a, yaep he, banhcujyin heuh gou daengz bangunghsiz, lauxsae naeuz: “Langhnaeuz mwngz mbouj siujsim boemz deng doengzhag baenzlawz guh? Baezneix suenq mwngz seizheiq ndei mbouj boemz dawz vunz. Gij doxgaiq daj giz sang boemz roengzbae haenq raixcaix, mwngz rox lwi?” Lauxsae lij lwnh gienh saeh neix hawj vunzranz gou nyi. Cuengqhag le, daxboh fok gou donq ndeu.

Gienh saeh neix hawj gou mingzbeg lo, ndaw swnghhoz saeh hung saeh iq cungj dwg doxlienz, hix dwg ndaej doxbienq. Saeh iq baihlaeng ciengzseiz hamzmiz gij dauhleix hung de, ndaw swnghhoz raeuz yaek daj saeh iq guh hwnj, “gaej raen saehndei iq cix mbouj guh, gaej raen saehrwix iq cix bae guh”.

(Liu Gyahhauz raiz；Goenggen hoiz)