Ngoenz ndeu, mehbyacaek daiq gyoengq lwgbya de ra gwn dauqma le, ciuqciengz aeu diemj diemj soq, yawj lwg de dwg mbouj dwg cungj gaenlaeng ma liux. Diemj sat le, mehbyacaek fatyienh miz duz lwg- byacaek iq ndeu, gwnz bak de maj ok mumh daeuj lo. Mehbyacaek daeuz- heiq liux.

“Lwg ha, aen bak mwngz vih maz maj mumh ha?”

“Gou hix mbouj rox ne, meh.”

“Beixnuengx mwngz miz mumh lwi?”

“Mbouj miz!” Lwgbyacaek neix yawj le yawj gyoengq beixnuengx henz ndang de.

“Mwngz yawj, daxboh、daxmeh cungj mbouj miz mumh. Mwngz dwg mbouj dwg baenzbingh la?” Meh- byacaek dawzok geij naed yw, hawj duz lwgbyacaek hwnj mumh neix gwn. Gvaq le geij ngoenz, mehbya raen gij mumh duz lwgbya neix maj ndaej engqgya raez engqgya hung lo. De naemj ok aen fap ndeu daeuj.

“Yawj daeuj, daxmeh cijndaej hawj mwngz guh soujsuz lobw, mwngz lau mbouj lau?” Mehbyacaek cam lwg de.

“Meh, cijaeu ndaej caeuq beix- nuengx gou ityiengh, gou gijmaz cungj mbouj lau.”

Yienghneix, mehbyacaek dawz fag geuz ndeu daeuj, “catcat” song mbat, dawz gij mumh lwgbyacaek raed bae liux lo. Hoeng gvaq le geij ngoenz, duz lwgbya neix youh daeuj ra daxmeh de lo.

“Meh, meh, gij mumh gou youh maj okdaeuj lo! Mwngz gangj baenz- lawz guh ndei ha?” Mehbyacaek mbouj miz banhfap, cijndaej soengq lwgbyacaek bae yihyen. Youq gwnz loh, mehbyacaek raen mehbyaleix cingq youq henz loh yousim danq- heiq.

“Mehbyaleix, mwngz you gijmaz ha?”

“Lwg gou mbouj maj mumh, gou you lai lo.” Mehbyaleix naeuz.

“Baenzlawz, mwngz miz lwg mbouj maj mumh ha?” Mehbyacaek geizheih dwk cam.

“Dwg ha, gou miz lwg ndeu daengz seizneix lij caengz maj mumh ne.”

“Vihmaz yaek aeu lwg maj mumh ne?”

“Dou byaleix seng roengzdaeuj couh maj mumh, neix dwg gij daegdiemj yienghsiengq dou ha! Mehbyacaek, mwngz yienghneix baenzlaenz, gaenj bae gizlawz ha?”

“Gou miz lwg ndeu mbouj rox vih maz maj mumh lo, raed bae le youh caiq maj, cijndaej daiq de bae yihyen hawj canghyw yawj lo.”

“Maj mumh, mbouj ndei ha? Vih maz itdingh aeu raed bae ne?”

“Dou byacaek coengzlaiz mbouj maj mumh, neix hix dwg gij daegdiemj yienghsiengq dou ha!”

“O, deng lo!” Song boux daxmeh lumj rox ndaej gijmaz nei ngaek- ngaek gyaeuj, caez hemq hwnjdaeuj:“Haengjdingh dwg lwg raeuz gaen loek daxmeh lo!”

Yienghneix, song boux daxmeh doxvuenh lwgbya, couh gag lingx lwgbauj bonjfaenh ma ranz lo.

（Yiz Sin raiz; Ouh Caijfangh hoiz）