Lwgvuengziq vubvubvebveb gag naeuz: “Langhnaeuz duj va de ndaej raen gijneix, de cix rox hozndat dahraix lo……de cix ae lai haenq dem lo, de lij cang dai dem, yienghneix vunz cix mbouj riu de lo. Gou goj deng guhyiengh ganq de, mboujne de cix bae dai dahraix lo.”

De youh naeuz dem: “Gou laihnaeuz gou miz duj va dog mbouj doih ndeu, dandan miz dujva itbuen ndwi. Duj va neix, caeuq sam goengq ndoifeiz sang daengz gyaeujhoq de……caemhcaiq miz goengq de lij ndaep mbouj dawz dem……miz doenghgij neix liux gou goj mbouj ak geijlai ne……”

Gangj liux, de cix boemzhoemj youq gwnz diegnywj, daejnga’nga.

Ngeih’it

Seizde, miz duz nyaenma ndeu buet gvaqdaeuj.

“Mwngz ndei!” Duznyaenma naeuz.

“Mwngz ndei!” Lwgvuengziq roxsoq roxlaex han naeuz. De veq ndang doxdauq, hoeng mbouj raen saek yiengh nauq.

“Gou youq gizneix, youq laj goek faexbingzgoj.” Gij sing de naeuz.

“Mwngz dwg bouxlawz?” Lwgvuengziq naeuz, “Mwngz ndeiyawj lai.”

“Gou dwg nyaenma.” Duznyaenma han naeuz.

“Gvaqdaeuj caemh guhcaemz vei.” Lwgvuengziq caeuq de naeuz, “Gou mbwq- linlin.”

“Gou mbouj ndaej caeuq mwngz caemh guhcaemz.” Duznyaenma naeuz, “Gou caengz deng vunz gyauq gvaq.”

“O! Doiq mbouj gvaq lo.” Lwgvuengziq naeuz.