Haggeiz neix, ban dou miz boux lauxsae moq ndeu daeuj. De singq Couh, vunz lumj dahsau iq nei, cungj maij daejsedsed.

Geiqndaej baez daih’it de hawj dou hwnjdangz, mwh de byaij haeuj gyausiz, hawj vunz roxnyinh de couh lumj boux dahcej hung ndeu, naj lumj cehgva, byoemgyaeuj swhyienz cuengq roengz, daenj fouq gingqda seiqfueng ndeu, gwnz naj de mbouj miz gij viyiemz lauxsae saekdi.

Yienghneix, dou couh hemqcauz hwnjdaeuj lo, ndaw gyausiz nauhyied ndaej lumj aen hawciengz nei. Couh lauxsae fatheiq lo, de hozhwnj ndaej naj hoengz lumj aen makbingzgoj liux, byaij hwnj gyangjdaiz bae naeuz:“Mbouj cauz, dingz roengzdaeuj!” Mbouj rox dwg aenvih de singq iq, roxnaeuz dwg aenvih gyoengq doengzhag mbouj lau de, geij boux doengzhag manz haenx cauz ndaej engqgya hwnjyinx lo. Mbatneix fajnaj lauxsae bienq ndaej hoengz gvaq aen makbingzgoj cug bae, raemxda youq gvaengzda baenq bae baenq dauq, doeklaeng dauqdaej doeksasa roengzdaeuj lo. “Lauxsae daej lo—” Mbouj rox dwg byawz hemq le sing ndeu, ndaw gyausiz sikhaek bienq ndaej caemrwgrwg liux. Gyoengq doengzhag lumj doxiu ndei haenx cungj ngaem gyaeuj roengzdaeuj. Lauxsae raen dou yienghneix le youh nyaenqndemndem riu lo.

Lauxsae dou yienznaeuz nienzgeij mbouj hung, hoeng de hwnjdangz sengdoengh mizyinx, singyaem caeuq gamjcingz habngamj, lienz gou, boux bingzciengz yungz- heih faensim haenx, hix deng dazyinx gvaqdaeuj lo. Miz baez ndeu, son goq《GAI RAEZ CIB LEIX SOENGQ CUNGJLIJ》seiz, ngamq doeg daengz duenh daih’it, de couh nyaenx mbouj ndaej daejsipsip lo, dou hix deng de yingjyangj daej hwnjdaeuj.

Ai, byawz heuh dou miz boux lauxsae maij daej he ne! Yienznaeuz yienghneix, dou cix gyaez de dangqmaz.

(Vangh Cihyinh raiz; Ouh Caijfangh hoiz)