上林县大丰镇中心学校六（3）班 Vangz Yizcan/黄日灿

Seizhaenx dwg gyanghaemh seizhah ndeu, mbwn dauq liengzseuseu, saek seiz miz di rumz ci daeuj, cwxcaih dangqmaz. Gou angqvauvau bae caeuq gyoengq nyeziq guhcaemz.

Sawqmwh, mbaq gou deng aen ngaeudiet soem youh raehrwd ndeu gvat hai aen baksieng, lwed hoengzsien mbouj dingz daj baksieng conh okdaeuj. Mbei dek le gou daejnganga hwnjdaeuj. Raemxda doekboegboeg, lumj raemxdah bongh ok haenx saek mbouj liux. Gyoengq doengzdoih cix roxdaengz cingzgvang yungyiemj, yiengh- neix miz mbangj louz roengzdaeuj nai gou, miz mbangj buet bae lwnh daxmeh gou.

Dingqnyi aen siusik neix, daxmeh doeksaetyat, naj- saek cungj bienq liux, lumj mbin dwk buet gvaqdaeuj aemq gou bae yihyen, aenvih mbouj ndaej gwih ci couh deng buet bae daengz yihyen, cix caengz yietnaiq.“Mbouj youqgaenj, canghyw duk couh ndei lo.”Gou cix foengx dwk daejngaungau. Gou roxnyinh daengz, gou daej ndaej yied rengz, daxmeh buet ndaej yied vaiq, baihlaeng de,najbyak de, naj de, cungj dwg lwgrou, gou seizhaenx mbouj rox de dwg raemxhanh？Raemxda？

Nyib baksieng seiz, daxmeh souj youq bakdou gizcinjsiz, mbouj bae saek lengq. Bakdou mbat hai,daxmeh couh bongh gvaqdaeuj umj gou gaenjgaenj dwk, haibak couh cam:“Lwg a, mbouj miz saeh le ha？Ndei di caengz？”Aenvih miz ywmaz, gou gangj mbouj ndaej vah, mboujgvaq leix auqmanz ndaej ngaekgyaeuj, longxriu didi. Daxmeh yawjraen yienghceij gou, cuengq gaemz heiq, cungjsuenq cuengqsim lo, ing youq bangxciengz riu dwk, yaep he lwgda fathoengz, raemxda doekboegboeg. Yaepyet, sim gou deng bungq lo.

Ma daengz ranz, gaenq dwg gyanghwnz lo. Daxmeh yienznaeuz baeg yaek dai lo, hix coengh gou vuenh buh saeg buh, caemhcaiq lij guh vanj dang hawj gou gwn. Yawjraen daxmeh youq bakcauq caeuq ranzding buet bae buet dauq, sim gou miz cungj gamjsouh ndeu gig geizheih. Dang guh ndaej lo, daxmeh bungj gvaqdaeuj naengh youq henz ndang gou, doq boq doq bwnq gou gwn, ndang gou yaep he raeuj hwnjdaeuj lo. Seizneix, daj bak gou lae haeuj conghhoz mboujdan dwg dang, vanzlij dwg cingz maij lwg rimradrad.

Ok saeh liux, dwg daxmeh lienzmuengz dawz gou soengq daengz yihyen, dwg daxmeh itcig buenx gou, dwg daxmeh itcig gvensim ciuqgoq, de vih gou yousim, cungj mbouj geiq swhgeij lo.

Gou yawj fajnaj daxmeh baegnguemnguem, ndaw riunyumj miz gyaez, lwgda miz maij rimradrad. Raemxda gou doekboegboeg……

Gij maij daxmeh hung lumj mbwn,miz cienz cawx mbouj ndaej. Gij saeh de guh haenx cungj gamjdoengh daengz gou.

（lauxsae son’gyauq Vangz Gveiyangh/黄桂香）