It

Duz roeg iq ndeu, youq gwnz faex sangvidvid, de miz rongz raeujrub, miz bwn ronghsien, de couh yienghneix vaiqlag swnghhoz. Youq henz faex miz aen ranzfaex iq ndeu, ndaw ranz youq miz boux baengzyoux ceiq ndei de, heuhguh Genj·Swnh.

Miz hwnz ndeu, aen ranzfaex iq Genj·Swnh mbouj rox vih maz dawz feiz lo, feizhung coemh dawz ndoengfaex seiqhenz aen ranzfaex iq, hoeng duzroeg iq moengz- loengz mbouj rox. Feizmbaw yubyub coemh goenq nyefaex cengjdingj rongzroeg haenx, duzroeg iq lij fangzhwnzloq haenx doek roengz ndaw feiz bae……

Haetromh, duzroeg iq ndiu gvaqdaeuj, moklox mumjgyumq hopheux youq henz ndang. De ngeux yawj seiqhenz, raen bonjfaenj cingq ninz youq ndaw aen hab iq ndeu, gwnz ndang goemq diuz sujbaq mbaeq iqetet ndeu. Hai da yawj bae, gij ngaeuz Genj·Swnh yaep raen yaep baex cwgoemq youq ndaw mokmbang, geu nditrongh ndeu laeuh gvaq aen ranz deng coemh ndaemndat haenx cik haeujdaeuj. Duzroeg iq maezvaeg ngonzyawj aen ranz iq boedbaih loemqlak haenx, sawqmwh dingqnyi rog cueng miz geij duz roeg doiq rwz sapsap：“Lwnh sou nyi, haemhlwenz dwg Genj·Swnh hawj aen ranzfaex iq neix dawz feiz bw!” ”W, couh dwg bog feiz neix coemh benq ndoengfaex neix lo, aen rongz duzroeg ninz ndawde haenx hix coemh liux lo.”…… Gyoengq roeg gangj sat couh mbin deuz lo, louz duzroeg iq gyaxgedged muenghyawj rog cueng, ndaw hoz huj Genj·Swnh yaek dai. De ndwn hwnjdaeuj siengj bek fwed mbin deuz, hoeng roxnyinh diuzfwed dotngubngub, cij ndaej louz youq ndaw ranz Genj·Swnh yw sieng.

Ngeih

Mboengq yw sieng haenx, Genj·Swnh doiq roeg iq ciuqgoq ndaej gig saeqsim. De vih roeg iq bwh ndei cijvaiz、mienhbau、sujbaqnat, lij caen fwngz bang roeg iq swiq ndang, ngoenzngoenz cungj buenx duzroeg iq. Hoeng, roeg iq cix mbouj lingxcingz, cungj dwg daegdaengq dwk bok cijvaiz, hix doiq Genj·Swnh mbouj leix mbouj langh, ciengzciengz hawj de dinfwngz luenh caez.

（caengz sat）

(Dungz Vanjdingz raiz；Goenggen hoiz)