Lwgvuengziq gag naemj naeuz: “Aen singgiuz neix geizheih lai! Youq gizneix mbwqlinlin, mbouj miz vunz caemhdoih guhcaemz. Vunz gizneix mbouj mizyinx saek di nauq, bouxwnq gangj gijmaz de cix riengz laeng gangj gijmaz……Youq gwnz singgiuz gou, miz duj va ndeu, baezbaez cungj dwg de aj bak gangj vah gonq……”

Ngeihcib

Lwgvuengziq byaij ndaej nanznanz liux, byaij gvaq diegsa, ngamzrin caeuq diegnae, doeklaeng cix byaij daengz ga roenhung ndeu, ga roenhung neix doeng bae daengz biengz bouxvunz.

“Sou ndei!” Lwgvuengziq naeuz.

Lwgvuengziq ndwn youq baihnaj bakdou suenva, ndaw suenva vameizgveiq ndok langh va hai.

“Mwngz ndei!” Vameizgveiq naeuz.

Lwgvuengziq cim doenghgij dujva neix, gyoengqde caeuq duj va swhgeij doxlumj dangqmaz.

“Gyoengqsou dwg va maz ne?” Lwg- vuengziq geizheih dwk cam naeuz.

“Dou dwg vameizgveiq.” Vameizgveiq han naeuz.

Seizde, Lwgvuengziq doeknaiq raixcaix. Ngoenzgonq duj va Lwgvuengziq naeuz de nyi, lajmbwn neix gag miz duj va de ndwi. Hoeng, youq aen suenva neix, miz haj cien duj va caeuq duj va de doxlumj liux.

（25）