Cibbet

Lwgvuengziq byaij gvaq diegsa. De raen gag duj va ndeu ndwi, duj va neix cij miz sam limq ndwi, goj mbouj baenzyawj geijlai……

“Mwngz ndei!” Lwgvuengziq naeuz.

“Mwngz ndei!” Dujva naeuz.

“Vunz cungj bae gizlawz liux ne?” Lwgvuengziq roxsoq roxlaex cam naeuz.

Miz ngoenz ndeu, dujva ndaej raen gvaq gyoengq bouxgaicawx ndeu byaij gvaq gizneix.

“Vunz?” Dujva han naeuz, “Miz roek caet boux vunz, geij bi gaxgonq gou ndaej raen gvaq gyoengqde, hoeng mbouj rox gyoengqde bae gizlawz gvaq. Rumz ci gyoengqde deuz gvaq, aenvih gyoengqde mbouj miz rag mbouj miz goek, dwgrengz lai.”

“Dauqraen!” Lwgvuengziq naeuz.

“Dauqraen!” Dujva naeuz.

Cibgouj

Lwgvuengziq benz hwnj goengq byasang ndeu, gaxgonq de ndaej raen gvaq sam goengq ndoifeiz sang lumj gyaeujhoq de ndwi. De dangq goengq ndoifeizdai de guh daengqeij. Lwg- vuengziq vubvubvebveb gag naeuz: “Ndwn youq gwnz byasang neix cim bae gyae, gou da ndeu cix ndaej yawjraen singgiuz caeuq vunz guhliux luba.” Hoeng, de cij raen dat soem dat raeh ndwi.

“Mwngz ndei!” De roxsoq roxlaex dongx naeuz.

“Mwngz ndei …… mwngz ndei …… mwngz ndei ……” Singhap cienz doxdauq.

“Gyoengqsou dwg bouxlawz ha?” Lwgvuengziq naeuz.

“Gyoengqsou dwg bouxlawz ha……gyoengqsou dwg bouxlawz ha……gyoengqsou dwg bouxlawz ha……” Singhap cienz doxdauq baez moq.

“Gyoengqsou guh baengzyoux gou ndaej lwi? Gou mbwqlinlin.” Lwgvuengziq naeuz.

“Gou mbwqlinlin …… gou mbwqlinlin …… gou mbwqlin- lin……” Singhap cienz doxdauq baez moq.（24）