Gou bineix 9 bi lo, gaenq vuenh gvaq le 8 swnj heuj. Moix baez vuenh heuj, daxmeh cungj riunyumnyum dwk gangjdaengz gij yiengh mwh gou baez daih’it vuenh heuj.

Geiqndaej gou ngamq gvaq 6 bi ngoenzseng, daxmeh couh hainduj ngauz swnj heuj youq cungqgyang hangzheuj laj gou haenx. Miz ngoenz ndeu, daxmeh angq dwk naeuz: “Diuz heuj cungqgyang mwngz yaek loenq lo.” Gou mbwnjbak naeuz: “Heuj gou yaek loenq lo, mwngz lij angq dem?” “Dahhuk, mwngz moix vuenh swnj heuj ndeu, couh ndaej maj sang donh ndeu.” Daxmeh lumh aennaj biz gou, gou daj gyang da de yawjraen aenyiengh bonjfaenh bizbiz. Daj neix hwnj, gou ngoenzngoenz ciuqgingq yawj swnj heuj neix, maqmuengh de vaiqdi loenq. Hoeng, gvaq haujlai ngoenz lo, diuz heuj ning neix cungj mbouj loenq. Dauqdaej miz ngoenz ndeu, daxmeh yawj hwnj yawj roengz haujlai nanz, naeuz: “Yawj daeuj hawj de gag loenq miz di nanz, raeuz bae yihyen hawj canghyw bang loek ba.”

Baez dingqdaengz ngaiz bae yihyen, lij aeu loek heuj dem, gou sikhaek siengj daengz gij cingzgingj dwglau boux canghyw ndang daenj buhhau fwngz gaem faggimz loek heuj haenx, hwk ndaej gou laebdaeb bi fwngz: “Mbouj, mbouj, gou mbouj bae yihyen!”

Daxmeh rox gou vihmaz lau le, riuhaha hwnjdaeuj.

“Yawj mwngz ngaiz hwk baenz neix!” Daxmeh aeu fwngz yoek najbyaek gou, “Loek heuj mbouj in saekdi, caiq gangj diuzheuj mwngz couh yaek loenq lo, bae le hix dwg hawj canghyw loq yungh di rengz satlo!”

Gou saenzdedded bae daengz yih- yen, canghyw led gij raemxyw henj hwnj swnj heuj ning gou bae, liuxle yungh aengeb ndeu daeuj geb diuz heuj gou. Gou cingq siengj gouz canghyw roengz fwngz mbaeu di, de cix yungh rengz loek doxhwnj mbat ndeu, diuz heuj couh deng loek hwnjdaeuj lo. Raemxda gou hix riengz dwk lae roengzdaeuj. Sijsaeq naemjnaemj, lae raemxda mbouj dwg aenvih in, dwg lau.

Ma ranz le, gou baez ciuq gingq, ya, hangz heuj laj veuq bae lo, lumj gyangbak miz aen conghndaem nei, yakyawj lai lo. Gou cam daxmeh: “Baenzlawz cijndaej hawj diuzheuj maj vaiq di ha?” Daxmeh dap naeuz: “Lai dak ndit, lai bouj gai couh ndaej lo.” Gou dingq le gij vah daxmeh, gipmuengz bae hai conghcueng, aj bak vauvau dwk, hawj ndit ciuq daengz giz veuq bae. Hoeng gamjsouh mbouj daengz raeujrub saekdi, dauqfanj lumj gwn rumznit nei.

Daxmeh riu dwk naeuz: “Dahhuk, mbouj dwg heuh mwngz dak heuj, hawj daengx ndang dak ndit cijndaej hawj heuj mwngz maj ndaej vaiq.” Gou dingq le suk hoz riu lo, riengjret couh buet bae baihrog dak ndit. Gvaq le geij ngoenz, bakveuq gwnzde maj ok le naed hauhau ndeu, lumh hwnjbae youh genq youh soem, wnggai couh dwg heuj moq lo. Gou angq dangqmaz!

Moix baez daxmeh daezhwnj gienh saeh neix, dou cungj nyaenx mbouj ndaej riu hwnjdaeuj, doengzseiz, gou hix daj gyang da daxmeh yawj ok de vih gou majhung angq lai lo. (seiq nienzgaep Bangz Beiz raiz Ouh Caijfangh hoiz)