“Song geu mumh, ngiengx doxhwnj, gangjvah lumj ngw lwgnyez daej, caenh swiqnaj, mbouj roi gyaeuj, doengxhaemh byaij roen mbouj aeu daeng daeuj rongh.” Sou rox gou gangj gijniex dwg gijmaz doenghduz lwi? Mbouj loek, couh dwg duzmeuz.

Duzmeuz daengx ndang bwnnyumnyum, aen’gyaeuj luenzlulu, daengj fouq rwz soemsedsed. Lwgda hunghung de maeq baenz diuz sej ndeu, hoeng baez daengz doengxhwnz, couh doq lumj song naed caw ronghmyigmyig. Cawx gijineix le, duzmeuz lij miz diuz rieng raezrangrang caeuq congh bak iq lumj yinghdauz ndeu.

Gou gig haengj duzmeuz iq neix, moix ngoenz bwnq haeux hawj de gwn. Miz baez ndeu, gou gaem gaiq saejnoh ndeu, cuengq youq henz bak duzmeuz, duzmeuz yungh rengz gaet gaemz ndeu, saejnoh deng gaet bae baenz mbiengj. Gou raen duzmeuz ngah gwn raixcaix, couh siengj nyexnyex de. Yienghneix, gou dawz saejnoh cuengq youq gwnz gvih, duzmeuz yawjraen lo, de baij ok gij yiengh hojlienz sisi, yawj saenzheiq cehda de, lumjbaenz doiq gou naeuz: “Bouxcawj iq, gou iek lo, aeu gijgwn hawj gou gwn ba.” Aen sim gou doq unq roengzdaeuj, dawz saejnoh baez di baez di bwnq hawj duzmeuz. Duzmeuz gwn liux le, conghbak lij doenghyubyub, lumjbaenz doiq gou naeuz: “Docih mwngz, bouxcawj iq, majhung le gou itdingh bauqdap mwngz.”Gou youq henz rwz duzmeuz naeuz: “Cungsim bauqguek.” Duzmeuz lumjbaenz dingq rox gij vah gou, ngaekgyaeuj sigsig.

Duzmeuz neix geijlai dwggyaez, gou haengjheiq de!

(Lij Langgez raiz Goenggen hoiz)