Hoeng, bouxlaux mbouj saenq gyoengqsou gangj bw. Gyoengqde bouxboux cungj ngah hah dieg gvangq dieg laux, nyinhnaeuz bonjndang ak lumj faexceizlingz, laux lumj faex- ceizlingz. Gyoengqsou heuh gyoengq- de suenq mbat soq ndeu vei, yiengh- neix gyoengqde cix angqfwngfwng, aenvih gyoengqde gyaez soq dangq- maz. Hoeng gyoengqsou mbouj hoj saivaih seizgan bae guh yiengh saeh mbouj miz yungh neix ne, guh goj mbouj miz yungh. Sou saenq gou liux bae.

daeuj daengz deihgiuz cix raen geizheih raixcaix, de cungj mbouj raen saek boux vunz. De lau byaij loek roen gvaq. Seizde, de laegfwngh ndaej raen duz ngwz ronghsagsag lumj ronghndwen ndeu ruenz youq gwnz diegsa.

“Gyanghaemh ndei!” Lwgvuengz- iq dongx de naeuz.

“Gyanghaemh ndei!”Duzngwz han naeuz.

“Gizneix dwg aen singgiuz lawz ne?” Lwgvuengziq cam naeuz.

“Deihgiuz! Gizneix dwg Feicou!” Duzngwz han naeuz.

“O! Gwnz deihgiuz neix mbouj miz vunz ha?” Lwgvuengziq cam naeuz.

“Gizneix diegsa! Ndaw diegsa mbouj miz vunz nauq ne! Deihgiuz hung lai gvangq lai.” Duzngwz han naeuz.

Lwgvuengziq ra ndaek rin ndeu naengh roengzdaeuj, ngiengx gyaeuj cim gyangmbwn.

De naeuz:“Ndaundeiq youq gwnzmbwn ronghmyabmyab, gou naemj gyoengqde dwg mbouj dwg hawj raeuz bouxboux vunz daengzlaeng miz saek ngoenz cungj ra raen ndaundeiq bonjndang ne? Mwngz yawj vei, aenndaundeiq duh gou, couh youq gwnz gyaeuj gyoengqdou. Hoeng de gyae’gyanggyang bw.”

“Gyaeu lai bw!” Duzngwz naeuz, “Mwngz daeuj gizneix guhmaz ne?”

“Gou guhnyah guh’unj dujva ndeu.” Lwgvuengziq naeuz.

“O!” Duzngwz han naeuz.

Daengx song boux de bak ngoemxngwt mbouj guhsing lo.

“Vunz youq gizlawz ne?” Lwg- vuengziq aj bak naeuz doekgonq, “Youq ndaw diegsa neix mbwq- linlin……”

“Bae daengz giz miz vunz, hix mbwqlinlin.” Duzngwz han naeuz.

Lwgvuengziq cim duzngwz ndaej nanznanz bae.

“Mwngz geizheih lai, iq lumj lwgfwngz.” Lwgvuengziq naeuz dem.

“Gou lij ak gvaq lwgfwngz guekvuengz bw!” Duzngwz naeuz.

Lwgvuengziq riuhehe naeuz: “Mwngz goj mbouj ak lai ma. Mwngz mbouj miz din, bae liuhlah mbouj baenz ne.”

“Gou dawz mwngz bae giz gyae- gyae ndaej, bae lij gyae gvaq giz aenruz bae ndaej daengz de.” Duzngwz naeuz.

Duzngwz heux youq gwnz din Lwgvuengziq, lumj goenhfwngz gim yienghde.

“Bouxlawz deng gou nyangzraen le, gou cix soengq de bae ranz.” Duzngwz lij naeuz dem, “Hoeng mwngz hozsoh simndei lai, youh dwg daj aen singgiuz wnq daeuj……”

Lwgvuengziq mbouj han saek coenz.

“Youq gwnz deihgiuz neix, mwngz unqnemnem, gou cojgvaq mwngz lai. Langhnaeuz daengzlaeng mwngz nawh mbanj ndiep ranz, gou cix gyaemj mwngz, gyaemj mwngz……”

“O! Gou rox mwngz gangj gijmaz lo.”Lwgvuengziq naeuz, “Mwngz vihmaz gangj vah gangj lumj vahduenz ne?”

“Daengzlaeng gou cix lwnh mwngz nyi.” Duzngwz han naeuz.

Gangj liux daengx song boux de youh mbouj guhsing lo.

（23）